ကိုယ့်ဘလော့ချေတိမှာ ဝင်းကိုခိုင်၏ တေးစီးရီးသစ် “အာရက္ခမြီ” ထည့်လို့ ဂုဏ်ပြုကတ်မေ

ရခိုင်အဆိုတော် ဝင်းကိုခိုင်၏ တေးစီးရီးသစ် “အာရက္ခမြီ” ကို ကိုယ့်ဘလော့မှာ ထည့်ချင်ကေ အေနိန်ရာ (Fileden)ကို Click နှိပ်လို့ ( Mediafire ) ကုတ်ကိုဒေါင်းယူပါ။ ပြီးကေ ယင်းကုတ်ကို ကော်ပီကူးလို့ Add a Gadget > Edit HTML မှာလားလို့ Paste လုပ်လိုက်ပါ။

Sunday, May 31, 2009

ငါ သိရေဒေ


ပင်လယ်ပြင်ကို
စိုးမိုးခရေ
လူတစ်ယောက်
အဂု...
ချောင်းကိုတောင်
ဖြတ်မကူးဝံ့ယာဆိုစွာ
ဇာကြောင့်လဲ့ ဂု ...။

မိုးပါ နွီပါ
ဘယ်လခေါင်မှာ
ရိုင်အပြည့် နန့်
ဝမ်းစာ ဟိရေ
မိသားစု တစ်စု
အဂု...
သူများဘက်မှာ
ကပ်စားနိန်ရစွာ
ဇာကြောင့်လေ့ ဂု...။

အယင်က စာတက်ပီကတ်
က၀ိ ပညာကျော် တစ်ယောက်
အဂု
"၀" လုံးတောင် မရွီးတက်စွာ
ဇာကြောင့်လဲ့ ဂု ...။

ကိုယ့်လီ၊ကိုယ့်သံ၊
ကိုယ်ပိုင်ဟန်နန့်
ဂုဏ်ယူဝံ့ကြွား
ပြောပါလတ်တေ
လူမျိုးတစ်မျိုး
အဂု ...
လီသံပြောင်းပါလတ်စွာ
ဇာကြောင့်လဲ့ ဂု ...။

သဇင်ပန်းချည်းယာ
တစ်သက်လုံး
ပွင့်ပါလတ်တေ
ပင်မြင့် က တော်ဝင်
စံတင်၊ရာဇ၀င်ပန်း
အဂု...
ခေါက်ရမ်းတိဂျီးယာ
ပွင့်ပါလတ်စွာ
ဇာကြောင့်လဲ့ ဂု ...။

သီလ သမာဓိကို
အသက်နန့်လှဲ
ကာကွယ်ပါလတ်တေ
ဒေ ကိုယ်တော်ကြီး
အဂု..
သူတော်မ နန့်
ဖောက်ပြန်စွာ
ဇာကြောင့်လဲ့ ဂု ...။

ကိုယ့်လယ် ကိုယ့်ယာ
ကိုယ့်ကျွဲ ကိုယ့်နွားနန့်
တစ်သက်လုံး
လုပ်စားပါလတ်တေ
ယာခင်းပိုင်သျှင် တစ်ယောက်
အဂု..
တောဝက်နန့် မျောက်
ပေါင်းနှင်ခံရစွာ
ဇာကြောင့်လဲ့ ဂု ...။

...................
အေးမောင်(ရင်အုံတော်ဓာတ်)
၃၁၊၀၅၊၂၀၀၉(၂၁:၁၇)

အသျှင်ဥတ္တမသို့


အ-ရှေ့က နိန်ဝန်းထွက်ရေပိုင် ‘အာယှ’ တစ်ခွင်ကို
အလင်းရောင်ပီးလို့ ‘အာယှ နိန်ဝန်း’ လို့
တင်စားခံရရေသူ။

သျှင်-တော်ဗုဒ္ဓကြွရောက်ခပနာ ဗျာဒိတ်တော်ထားလို့
ဗုဒ္ဓကိုယ်ပွားတော်စံပျော်ကိန်းဝပ်ရာ ပြည်ရက္ခာမှာ
မွီးဖွားခရေသူ။

ဥ-တုဂီမန္တမာ ဖနပ်မပါ ထီးဗလာနန့်
သောက်ရီနတ္ထိ ခိုစရာမဟိဖြစ်နိန်ရေ ပြည်သူတိအတွက်
အသက်ကိုစတေးပနာ ခို၊သောက်၊နားရာ အရိပ်ဆာယာကို
ပီးဆောင်ခရေသူ။

ဥတ်-(အုတ်)တချပ်သဲတပွင့်လောက်တိုင်းပြည်အတွက်
အကျိုးပြုရေလူတိထက် အဆပေါင်းမျာစွာသာခဂေလေ့
မျက်ကွယ်ပြုထားခြင်းကို ခံနိန်ရရေသူ။

တ-စ်ကောင်ကိုလည်းမကြောက် ခြသီင်္းဟောကတေပိုင်သံနန့်
“အဝေ..ဂရက်ဒေါက်! ငါ ရို့ပြည်က အဂုထွက်လားလီ” လို့
နှင့်ထုတ်ဝံ့ခရေသူ။

မ-တရားအုပ်ချုပ်မှုကို ခေါင်းငုံ့မခံ ဇာတိမာန်နန့်
ကိုလိုနီကျွန်ဘဝက လွတ်မြောက်ရအောင်
အသက်ကိုပီးလို့ လွတ်လပ်ရေးမီးယှူးတိုင်ကို
ထွန်းညှိခရေသူ။

သို့-သော်…..
အသျှင်ထွန်းညှိပီးခရေ မီးကိုသုံးပနာ အခြားလူတိ
တိုက်တာတိနန့် နိန်နိုင်ဂတ်ကေလေ့
အသျှင်မွီးရာ ပြည်ရက္ခာမာ စားစရာမဟိ နိန်စရာနတ္ထိ
အဂုအထိ ငရဲအတိပိုင်ဗျာယ် “အသျှင်”။

.........................
ကျောက်ရိုး-လွှမ်းမိုးခိုင်

ဦးဥတ္တမ


ဦး-စွာပထမ ကျွန်ဘဝက
လွတ်မြောက်လီအောင် စွမ်းဆောင်ညွှန်ပြ
ဟောပြခလီ အာဇာနီကား
‘The Light of Asia’ ဟု
နာမတွင်ရ ဦးဥတ္တမ။

ဥ-တုရာသီ ပြောင်းလားလီလေ့
အသျှင့်သတင်း ကျော်ဇောခြင်းကား
ရိုးတောင်ထိပ်က သဇင်ရနံ့ပိုင်
သင်းပြန့်ကြိုင်မြဲ မွီးနိန်ဆဲးပါ။

တ္တ -စ်ခွန်းချေမျှ မဟဝံ့ဘဲ
နှုတ်ပိတ်နိန်ရာ ယင်းချိန်ခါက
”အဝေ…ဂရက်ဒေါက် ငါ့ရို့ပြည်သား
မင်းကားမဟုတ် အဂုထွက်လားလီ”ဟု
ရဲဝံ့စွာနန့် ပြောဝံ့ဆိုဝံ့
နှင်ထုတ်ဝံ့ခ ဦးဥတ္တမ။

မ-ဟုတ်မခံ ဇာတိမာန်နန့်
ပြည်သူအများ ကျွန်ဘဝက
လွတ်မြောက်လားအောင် အသက်သွီးကို
ပီးဆပ်ပါခ ”ဦးဥတ္တမ“ကို
ရိုကျိုးဂါရဝါ ဒေကဗျာနန့်
ဦးညွတ်ပါယင့် ဦးညွတ်ယင့်။

.....................
ကျောက်ဖြူ- လွမ်းမိုးခိုင်
၁၁-၁၂-၀၈

Saturday, May 30, 2009

ဘ၀ချေနီမ၀င်ခင်


ဝမ်းခေါင်းချေဗလာကျင်းပနာ
စားစရာမဟိခါမှရာ
ကိုယ့်ကိုယ်ကို ဆင်းရဲတွင်းနက်မှန်းအသိ
ကြွီးမြီတိ တခရွီနန့် --။

ဒေကြားထဲ
အချေတွဲလီတွဲလောင်းနန့်
ဆန်နှစ်သိုက်လာတောင်းရေ လယ်သမား။
အခေါင်မိုးယိုလို့ဆိုပနာ
အုန်းပျစ်လာတောင်းရေ လက်သမား။
စားစရာမဟိလို့လတ်
ဟင်းရွက်ချေဆွတ်ခွင့်တောင်းရေ ကိုင်းသမား။
အစားမခြီလို့ဆိုပျာယ်
ငါးတခွက်လာတောင်းရေ ပိုက်သမား။

ထိုတယောက် ဒေတယောက်နန့်
ဒုက္ခချေရောက်လိုက်ကတ်ပုံတိ
ကြုံရေလူတိုင်းသိရေ --။

ယေနန့်ရာ…
ကိုယ့်အပူနန့် ကိုယ်လို့ပြောပြောယင်း
မိုးလင်းက နီတ၀င်ထိ
ဒုက္ခကို လွှတ်ထားမိကတ်စွာ --။

ဖောင်စီးယင်း ရီငတ်ယင်းနန့်
ကုဋေ သျှစ်ဆယ်ကြွယ်သူဌီးသားပိုင်
လပ်ယျားလပ်ယျားနီခပြီးရေဘ၀
ထည်ကြီးပျက် နာမည်ခံလျှက်
သင်္ခါရတွင်းနက်ထဲက အဖပြည်
ဇာပယှောင် ဖြေသာဖို့လဲယေ --။

အတိတ်က ကြွယ်ဝခရေတိုင်းပြည်
အတိတ်က ပေါများခရေ တိုင်းပြည်
အတိတ်က ထိတ်ဆုံးဖြစ်တေ တိုင်းပြည်
အခု... နှိုင်းလီကေ ဘိတ်ကျ
အိပ်စက်ခြင်းက မထနိုင်ပျာယ်လားလို့
လက်မှိုင်ချတွေးတောနီဖို့အစား
ထထိုင်လျှက် သွီးစကားပြောပါပလင်
သူငယ်ချင်း...
ဘ၀ချေ နီဝင်မလားခင် --။

..................
(ပန်းနုဇံ)

ပြောင်းလဲခြင်း


ပင်လယ်ပျော်လို့ခံယူခပါယင့်
ရီကူးမတတ်တေ ကျွန်းချေပိုင်ဗျာယ်
နှုတ်မရရေ ခြီနှစ်ချောင်းကို ဆွဲမ,ယင်း
ကျမွတ်အိုင်က လိုင်ပင်းရောက်လာရေခါ
ပုတ်သမျှလှိုင်း ခတ်သမျှဒဏ်ကို
ခါးစီးခံရကတ်စွာက မဆန်းဗျာယ် --။

ယေနန့် …
ညဇာက ရွာချလိုက်တေမိုးတစက်
ရိုးမကို အရည်ဖျော်ချပျာယ်
ကျုပ်ရုပ်လုပ် ကဇတ်ခံလိုက်ရရေ
နဖားကြိုးတန်းလန်းနန့် --။

ယင်ပိုင်နန့်ရာ ဘ၀တိက
နီရိုဘုရင့်တယောတလက်က ကျကျန်ခရေ
မီးတိုက်ခံ သံစဉ်တိကိုအာခံယင်း
ဖနောင့်ပြတ် ဖနပ်ပါးချေကထွက်တေ
စည်းဝါးကျခြီသံချေကို မက်မောတတ်လာရေ --။

ဇာပင်ဆိုဆို...
ပျော့ညံ့နီရေ ကျုတ်အိုင်ချေအဖြစ်နန့်
အနင်းခံလိုက်ရဖန်များလာရေအခါ
ရီချေခမ်းခြောက်ယင်း အသားကျ
ပြန်ဗျာယ် မာမာလာကတ်ရရေမလား --။

...................
(ပန်းနုဇံ)

သွီးပျက်


ကောက်စရီတခရွီနန့် ပိတ်ဖုံး
တိတ်တိတ်ပုန်း ကန်ရီပြင်ချေမှာလည်း
မိုးငွေ့မိုးလျှံဖြစ်ဖို့ ရီအပြည့်နန့်ရာ
တိမ်ရေကာလို့ ပြောပစ်ဖို့
မြင်ကမမြင်နိုင်မလား --။

အဇ္ဈတ္တကောင်းကင်ပြင်တခုထဲ
ပျံဝဲလိုက်မိရေ စက္ကူစွန်ချေမှာတောင်
ကြောက်တတ်တေအသဲမဟိ
မိုးထိရောက်ချင်ရောက်လီဖိယေ --။

ထော...!
ကတ်ထူစက္ကူပုံးခွံချေတပုံးနန့်
တန်းဗျထက်မှာ ရီခံလို့မဖြစ်တေအခါ
ရီကိုရာ ခဲအောင်လုပ်မိကတ်တေ ဘ၀မှာ
အိမ်မက်ဆိုးရာ ထူထူလာလတ်တေ --။

လူသားဘ၀ဆိုရေ အခန်းတခုမှာ
အတ္တကြပ်ခိုးတိ တွဲလီတွဲလောင်းနန့်
မွန်းကျပ်ပိတ်လှောင်နီကေတောင်က
ဘ၀ကို မလှောင်တတ်စွာထားဖိ
သိသိနန့် ရောင့်ရဲမိသူ နှလုံးသားထဲ
သူ့တကိုယ်စာတည်းကိုဖက်တွယ်
ပြက္ခဒိန်လည်း ရက်ရှည်လားခပျာယ် --။

ယင်းပိုင်နန့်ရာ...
ကျောက်သင်ပုန်းဘောင်ချေအဆုံး
စီးစိုင်တခုလုံးကို တင်ရွီးယင်း
မြင့်မားခြင်းဟူသည်ကို လိုက်ရှာ
သွီးပျက်တေ ဘ၀ကမ္ဘာအဆုံးယေ
ပြာပုံဘေးမှာ ပိတုံးချေကုတ်လို့ --။

....................
(ပန်းနုဇံ)

ရရိုးချချင်းချေပါ


ပုပ်ထဲကစပါးတိ ရာဆိုကေ
အနင်းခံသမျှ လှလှပါလတ်ဖို့ …။

အိမ်ပြတင်းဖွင့်လျှက်နန့်ပင်
အလင်းတစမျှင် မ၀င်နိုင်ရေ အိပ်ခန်းထဲ
လဲလျောင်းအိပ်စက်မိရေ အဖပြည်ခမျှာ
ခြီလေးချောင်း ရုန်းရွိမရရေ စားပွဲခုံတလုံးပိုင်
အနည်ချေထိုင်နီခစွာ ကြာပျာယ်
ဖုန်တသောနန့် …။

ဗါဒီချေအပေါက်တလုံးနန့်
ရီခတ်မိရေ ဘ၀တိဆိုရေပိုင်
လ္ဘက်ရည်ဆိုင်စကားဝိုင်းမှာ
ဝင်ဆန့်လားရေ နာမည်တခုအတွက်
ဂုဏ်ယူဖို့အင်အား ထွက်လာကတ်စွာအမှား --။

ထော…
မှန်ဘီလူးခုံးထက်မှာ ဖြောင့်စင်းရေဓါးကို
အပြင်မှာ တံဇဉ်တလက်ရာလို့
ဇာသူယုံကြည်နိုင်ဖို့လဲလို့
တွေးလိုက်ကြည့်လိုက်မိတိုင်းမှာ
အပျင်းတချက် ဆန့်တတ်တေစိတ်နန့်
ညချေ… အိပ်အိပ်လားစွာမနည်းပျာယ် --။

ယေပိုင်နန့်
ကျောက်ခဲရော မီးသွီးရော ဒြပ်အရောအနှောထဲ
ပျောက်ပျက်လားရေယိုင်ကျေးမှုတခုကို
အခု…တွိနိုးမြင်နိုးလိုက်ရှာမိသူမှာ
ပွိုင့်ကမ်းမှာ ခရုကောက်ခံစားမှုနန့်မတူမှန်း
(အကျွန်ရို့လူငယ်တိုင်း)
သိဖို့တော့ ကောင်းယင့်ထင်ပါရေ --။

.......................
(ပန်းနုဇံ)

သေချာမှုတခု ရွီး


ရင်ထဲအသိစိတ်ဟိယင့်နန့်ရာ
ဘောင်ခတ်စည်းတားခံဘ၀မှာပျော်ပိုက်
ရက်ပြတ်.. ငိုက်နီကတ်ဖို့လား --။

ဘ၀၏အနီရောင် တန်းခါးတချပ်ကို
မဖွင့်ဝံ့ ဖွင့်ဝံ့နန့်ရာ တွန့်ဆုတ်
ဂျောင်မှာကုတ်ဖြစ်ခရေ နိရက်တိပင်
ငါရို့ကို ရယ်ချင်ရယ်နီမည် ..ထော --။

ရခိုင်ပြက္ခဒိန်တချပ်ကို ကြည့်လိုက်
အမျိုးသားနိ မဟိ
တော်လှန်ရေးနိလည်း မလာ
လွတ်လပ်ရေနိသစ်လည်း မပါ
ဗလာဗလာ ကွင်လပ်ထက်မှာ
ပြသဒါးရက်တိရာအပြည့် --။

ယင်းနန့်ရာ
ရာဇ၀င်ထဲကရခိုင်ပြည်
ညောင်ပင်သဆီချေပိုင်တွဲလဲလဲ
တစစနန့် လွဲလွဲပါလတ်တေ မိုင်တိုင်အောက်
လူမျိုးလည်း ပျောက်ပျောက်လာလတ်ပျာယ်
အပူဆိုးနန့် ခြောက်ခြောက်လာလတ်ပျာယ် --။

ပန်းမျောက်ကဇတ်တေပိုင်
ဆန့်ကျင်ဖက်မျက်နှာပြင်နှစ်ဘက်
ကျချင်ရေဖက်ကျ လန်ချင်ရေဖက်လန်
ပန်းနန့် မျောက်
အမှန်နန့် အမှား
အဖြူနန့် အမဲ
ကျွန်ဘ၀နန့် လွတ်လပ်ရေး
ဇာကိုအမှန် ရွီးဖို့လဲ --။

တခုတော့ဟိရေ
တနိ... လွတ်ကိုလွတ်မြောက်ဖို့လိုရေ --။

....................
(ပန်းနုဇံ)

ရခိုင်လို့ ခံယူမိရေနိက


ဘ၀မှာ
ငါ့စိတ်ငါ လိမ်မရစွာက ဒုက္ခ
ဟုတ်သမျှ အားလုံးကို အစုလိုက်
မီးတိုက် င်္သဂြိုဟ်လိုက်ချင်ရေ...
ရင်ဖတ်ကြီး ဟက်တက်ကွဲနန့်
အသက်လည်း ဆက်မရှင်လိုပါ --။

အားနည်းချက်တခုအတွက်စိုင်းစား
ရိုင်းလားရေ သမိုင်းကြောင်းတခုအတွက်
အခုထိ နီတောင်မထွက်နိုင်သိမ့်
ယေနန့်ရာ.... တလမှာ
သုံးဆယ့်တရက်လကွယ်ခ --။

အချေခါပိုင်
ဝါးနန့်ကျောက်နန့်ထုကတ်လို့
ဝတ္ထုဖြစ်လားကေ ကောင်းယင့်
ပုပ်သိုးဟောင်းနွမ်းပြီးသား အမာရွတ်ကို
မိတ်ကပ်ထူထူနှိမ်းဖို့လည်း
ငါကား သတ္တိမဟိကာ --။

ယေနန့်ရာ
အိပ်မောကျရေနိရက်တိကို ဆုတ်ဖြဲယူ
ဘ၀တူ မောင်နှမတိကြားထဲ
ငါလည်း တေးခြင်းဆိုလိုက်တေ...
(ရခိုင်ပြည် xxx ငါရို့ပြည် xxx ငါရို့ပြည်ကို ငါရို့အုပ်ချုပ်မည် xxxx)

...................
(ပန်းနုဇံ)

ဆန္ဒတခုနန့် ပျံသန်းခြင်း

မဦးမစိုက်
ဗြုန်းစားကြီး ဆိုက်လာရေ အလင်းအောက်
နမော်နမဲ့ ဖြတ်ပျာယ်လျှောက်ခြင်းမဟုတ် --။

ငါ့ကိုယ်မှာ ပျောက်ဆုံးနီရေ အိမ်မက်တခုကို
ရုတ်ချင်း ကောက်ရလိုက်တေပိုင်မျိုး
ရခိုင်သားဘ၀ဆိုရေ အနှစ်သာရကို
ဝမ်းသာအားရနန့် ဧည့်ခံ
ကျေနပ်စွာ လက်ခံလိုက်ချိန်မှာ
ဘ၀၏အမှောင်ကောင်းခင်က
ပရောမီးသယပ်စ် (Prometheus) လက်ဆောင်ပီးခရေ
နီမင်းလင်းရောင်ခြည်ပိုင်ပျာယ် ငါ့ရှိမှာ
ဖြင်းခနန့်….လင်းလို့ --။

မွီးလာရေအချိန်ကပင်
ဘ၀၏နိဒါန်းတံခါးဝမှာ ရွီးထိုး
“နီထွက်ဘုရင် ကျွန်တော်မျိုး” လို့
ရိုက်ချိုးခံလိုက်ရရေ အသိတခုကို
နိတိုင်းစားသုံးယင်း စားသုံးယင်းနန့်
အဆိပ်လည်း ပြင်းပြင်းလာတတ်တေ
အတိတ်လည်း ယှင်းယှင်းလာလတ်တေ
ယေပိုင်နန့် ရာ
ငါ… ကျွန်ဖြစ်နီခရေ --။

အိမ်မက်တခုထဲက ဗြုန်းဆိုနိုးပြီးမှ
မပျိုးလိုက်ရရေ ပြဇာတ်တခုအတွက်
ပြန်ထွက်ကပြဖို့ကား မရေရာ
သေချာရေ ကျောက်ထွင်းအနုပညာတိက
အဖရခိုင် အသဲပြင်တခုပိုင်ပြောပြ
အခုတိုင် ရင်ကွဲပက်လက်နန့် --။

ငါတွေးကြည့်မိရေ…
ငှက်ချေတကောင်ကို အတောင်ဖြတ်ပျာယ်
လှောင်အိမ်ထဲက လွှတ်ပီးလိုက်စွာပိုင်
ငါချစ်တေ အဖရခိုင်ပြည်ကို
ကြိုးရှရှည်နန့် တွဲလျောင်းချိုင်
မိုင်တိုင် (၂၂၅) အထိ
သူရို့တိ ကျောင်းထားနိုင်ရေဆိုတည်းက
ငါ့ကိုယ်ငါ သတ်သီဖို့ကောင်းယင့် --။

ယေပိုင်နန့်ရာ
ငါလူဖြစ်နီရေ နိရက်တိုင်း
နှလုံးသွီးကို ဖောက်ထုတ်အစားခံ
တခါပြန် တခါပြန်နန့်
ဇာခါအမှန် မလွတ်လပ်နိုင်သရိ
ဆယ်ခါပြန် အကျဉ်းချခံလိုက်မည်
(အဖရခိုင်ပြည်အတွက်) ငါ့ကိုယ်ငါ…
ဒုတိယ ပရောမီးသယပ်စ် (Prometheus) ဖြစ်ချင်ရေ --။

...................
(ပန်းနုဇံ)

နှုတ်မဆက်ချင်ပါ ပြန်လတ်ဖို့

ခရီးဆောင်အိတ်တလုံးကို
ခိုင်မာရေ လက်ချောင်းအစုံနန့် ဆွဲမ
ခွဲရဖို့ အသိချေက မြှားတစင်းပိုင်
ငါ့ရင်စိုင်ကို ဖြတ်ဝင်လားစွာ နင့်ခနန့် --။

ဇာသူမဆို
မွီးရပ်မွီးမြီကို ခွဲရရေအခါ
ဒေပိုင်ရာ ကြုံလာတတ်စွာမျိုး
အဆိုးဆုံးက
အဖရခိုင်ပြည်နန့် ၀ီးနီရရေဘ၀အဖြစ်
လွမ်းရစ်လွမ်းဖြေ လွမ်းမပြေနိုင်စရာမလား --။

တချက် မှင်သက်မိခါပြီးမှ
ကောင်းခင်ပြင်တခုလုံးကို
မျက်ရည်စက်လက်နန့် ပြုံးပြ
ငါပြန်လာမည် စိတ်ချလို့
ငါ့စိတ်က ပြောမိရေစကား
သူကြားရေပိုင် ငါနားလည်
အံကြိတ်ပျာယ် ထွက်လာမိပါရေ --။

အော်...
လွမ်းလိုက်ပါ့မည် တနင့်နင့်
လှမ်းလိုက်ပါမည် တဆင့်ဆင့်
ကြွီလွင့်ပြီးဖြစ်တေ သမိုင်းအပင်အို
ကိုင်းရွက်ညို ကြွီချင်ကြွီပါလီ
သွီးရောင်နီ အလင်းစက်ချေအောက်
အဆင်းတလှ ပြန်ပျာယ်ပေါက်ကေ
ငါ... ပြန်လာလတ်မည်
နှုတ်မဆက်ချင်ပါ ပြန်လတ်ဖို့ --။

...............

(ပန်းနုဇံ)

(အဖရခိုင်ပြည်နန့်ဝီးကွာနီရရေ သူငယ်ချင်းရဲဘော်အပေါင်းအား ဦးထိတ်ထားလျှက်)

နာတာရှည်


ခုံထက်က
သူ့ကိုမြင်ကေ
ဇာတိနာ
ဖျာကာလို့ကမရ
နတ်ကောင်းမ
ပတ်သံကြားစွာပိုင်
မနီနိုင် လက်ဖျားချေယားလို့
က,မိလားစွာက
ဘလော့ဂ် က,ကွက် ။ ။
...................
ကိုမင်း

ဒီးဒီး!ဘားဘား! ဒီးဒီး!ဘား!

ကျောင်းတက်ပျင်းရေ ညီပုချေ
အဂြိုထွက်လိမ့်မေ။

အဂြိုထွက်ကေ ဗဂျီးနွား
တူဖို့မကြောက်လား။

နွားနန့်တူကေ ဇာစားရေ
ထမင်းမစား မြက်စားရေ။

ညီပုချေ သတိထား
ထမင်းမစားမြက်ကိုစား
နွားချေလုပ်ဖို့လား။

ဒီးဒီး!ဘားဘား! ဒီးဒီး!ဘား!
...................
Wanlet (Lay Waddy)

ရွင့်ရာ ရွင့်လီ

အစ်ကိုချေ
ချင်းလား
ကရင်လား
သျှမ်းလား
မြန်မာလား --။

ယင်းပိုင်ဆိုကေ
အကျွန့်ကို လာနှုတ်ဆက်ပါ --။

ယေကေလည်း အစ်ကိုချေ
“ယခိုင်” “ယခိ”ရာဆို
အကျွန့်ကို အဖတ်လုပ်စရာ
မလိုပါ --။

အခင်ကြီး
မွန်လား
ကယားလား
ကုလားလား
တရုတ်လား
ယင်းပိုင်ဆိုကေ
အကျွန်နန့် ပြောဆိုဆွေးနွေးပါ
ယေကေလည်း အခင်ကြီး
“ယခိုင်” “ယခိ” ရာဆို
အကျွန့်ကို ပြောဆိုဆွေးနွေးစရာ
မလိုပါ --။

အရီးချေ
ထိုင်းလား
တိဘက်လား
ဗီယက်နမ်လား
အိမ်ဒိုနီးသျှားလား
ယင်းပိုင်ဆိုကေ အရီးချေ
အကျွန်ရို့အိမ်မှာ လာတည်းပါ --။

ယေကေလည်း အရီးချေ
“ယခိုင်” “ယခိ” ရာဆို
အကျွန့်အိမ်တည်းစရာ
မလိုပါ --။

ဂိုးချေ
ရိုမီးနီးယားလား
ဂျာမန်လား
အမေရိကန်လား
ပြင်သစ်လား
ယင်းပိုင်ဆိုကေ
အကျွန်ရို့ တိုင်းပြည်လာလတ်ပါ
ယေကေလည်း ဂိုးချေ
“ယခိုင်” “ယခိ” ရာဆို
အကျွန့်တိုင်းပြည် လာစရာ
မလိုပါ --။

တမျိုးတော့ခါ
မထင်ကတ်ပါကဲ့
“ယခိုင်” နန့် “ယခိ” ကို
သီအောင်ကြောက်လို့ပါ --။

.........................
အေးမောင် (ရင်အုံတော်ဓာတ်)
၃၀၊၀၅၊၂၀၀၉ (၁၈:၄၆)

မောင်ကြီးသျှင်သို့

စောင့်နီပါရေ မောင်းမောင်
ဇာခါလာဖို့လဲ
သွီးတောင်ဆုံးလားယာ --။

တိုက်စိုးရို့ပိုင်
လက်နက်ချရစွာကို
မှိုရရေမျက်နှာနန့်
ပြန်ဝင်လာဖို့လား --။

မောင်းမောင်ရို့ကို
တချို့က ပြောကတ်တေ
“လက်နက်ရှာဖွေရေးအဖွဲ့“ ဆို --။

မယုံပါ မောင်းမောင်
မနာလိုလို့ ပြောစွာရာဖြစ်ဖို့ --။

မောင်းမောင်ရို့ အစွာလောက်
မျိုး“ခြစ်”စွာကို သိပါရေ --။

မောင်းမောင်သူရဲကောင်း
မင်းအလောင်းကို
ပန်းကုံးစွပ်လို့ င်္သဂြိုဟ်ပါဖို့ --။

လာရာလာလတ်
ပြန်မရွှတ်ပါ --။

လက်ရွီးမလှ စာလုံးကျ၍
သတ်ပုံမှားက
သည်းခံ၍ဖတ်ပါ --။

....................
(လက်မှတ်)

(ခြစ်/ချစ်?---ကဗျာပိုင်ချင်သာဆုံးဖြတ်ပီးပါ။)

မြန်မာမ

အနာပြည်ပုတ်တိကို
ဖုန်းအုပ်ထားမရ
ရဲရဲကြီးခွဲထုတ်
မြီမြုတ်ပစ်ရမည် --။

ချစ်ကြည်ရေးဆိုရေ
“မလာဥ” စကားတိနန့်
အတွင်းပြည်နာ လှိုက်စား
တရိရိဝေဒနာ
ခံနီရစွာက ပြည်သူ --။

တနိကျ
အောင့်မရလို့
ပြည်ပုတ်တိ မီးတောင်ပိုင်ပေါက်ကွဲ
မြန်မာပြည်မှာ (၈၈၈၈)
အရေးအခင်းဖြစ်တေ --။

အခုလည်း
ကျန်နီသိမ့်ရေ အနာပြည်ပုတ်တိကို
နှုတ်ပစ်ဖို့
ပြည်မြန်မာမှာ
ဆရာဝန်တိလိုရေ --။

အေနီရာမှာ
(ကြောင်ချီး) တိ မပါ --။

”ပြည်ထောင်စု” လတ်
သကာလူးထားရေ
အာလူးဂါထာနန့်မန်းမှုတ်
ဆီသုတ်ဖို့ ကြိုးစားအားထုတ်သူများစွာ
လက်တွိမှာ
စိန်နားကပ်နန့် ပါးပြောင်
အယောင်ဆောင်တိရာဖြစ်တေ
သူငယ်နာ နှပ်စားတိရာဖြစ်တေ --။

ယင်းပိုင်နန့်
တလင်ကွာ မဆမ
မိခင်မြန်မာမသည်
ဝမ်းတွင်းပါ ”မာဒြာ” ကို ချွတ်မရ
အနိစ္စဖြင့် ဈာန်ကြွ
(မရဏ)
ဘ၀ပြောင်းရလီကုန်သတည်း --။

..........................

(မောင်ပေါက်)

ကြွီး

အတင်ဆိုလေ့ ကျီ
အဆပ်ဆိုလေ့ ကျီ
ဥပေက္ခာစကား တိနန့်
“ပဝေသဏီကစွာတိကိုလေ့”လို့
ကြွီးဟောင်းတိကို
မိန့်ဂွန်ဆောင်လို့သိမ့် ... ။

စကားကမဆုံး င/ပြာသားမာ
ဖွဲမီးနန့်အဂုထိအကင်ခံရတုန်းဆိုစွာ
နောက်ကုန်းကို " အုန်း " ခနဲမြည်မ
ကြွီသစ်တိ တခရွီနန့်
စစပ်ချေတွိယင့် ... ။

ရီချေတခွက် ကွမ်းတယာချေရာလို့
စားပတ်စီထိုင်ကြည့်နီခကတ်စွာ
မပြောမဆို
အိုးဖွင့်လို့တက်စားနီဗျာယ် “ယာ!!!”
ယကေလေ့
ကြွီးဆပ်ဖို့ နက္ခတ်ကြုံဖို့ရက်
ထိုင်စောင့်နီဖို့သိမ့်လား ... ။

ဒေပုံနန့်
တတုတ်ကုန်ကတ်ယါ
ဂိုးချေအလှည့်ဆိုစွာ
ဇာခါမြင်ခီရဖို့ .... ။

......................
ကိုမင်း

မိုးမျှော်တမ်း လွမ်းခြင်း

(၁)
တက်သီးတချက်
ပြင်းပြင်းခေါက်လိုက်မိသည် --။

ရင်ထဲမှာ မကျေနပ်ချက်တိမွန်းကျပ်
အသက်လျှူမ၀ --။

လက်သီးကို နနောင်းဆုပ်
အကြောင်းမဲ့ ကြမ်းပြင်ကို
ထုလိုက်မိရေ --။

ပါးစိကို တင်းတင်းကိုက်ထား
မိတ်ရိုးများ ကားထွက်လာ၏ --။

ဂေါင်းထဲမှာ ထိုအတွေး ဒေအတွေး
အတွေးပေါင်းများစွာ ယောက်ယက်ခတ်
ချုပ်ထွီးလျှက်ဟိရေ --။

မျက်စိကို စစိမှိတ်
ထွက်သက်ကို နခေါင်းထဲက
မှုတ်ထုတ်ပစ်လိုက်တေ --။

ဒေါသအငွေ့ကြောင့်
ထွက်လီ၏အပူရသ
ကြောင်းလို့ ခံစားလိုက်ရရေ --။

နားဂျီနှစ်ဖက်က
စမုတ်ကြောများ
ထောင်တက်တင်းမာ
သံချောင်းများပမာ --။

ကုတ်ထားသည်မျက်မှုန်
ရှုန့်တက်လာရေ တွန့်ကြောင်း
အပေါင်းများစွာ --။

ခံစားချက်များပြင်းထန်
အောင့်အည်း သည်းမခံနိုင်ရေအဆုံး
ငါးသလောက်ပြုံး ပြုံးလိုက်မိသည် --။

(၂)
နီရာတကာ မသမာမှုတိကြီးစိုး
ကကောင်း အရုပ်ဆိုး၏ --။

ဒုက္ခကို ဂြင့်ခါးသီးပိုင်
ချိုမြိန်စွာ စွဲလမ်း
တမ်းတမ်းတတ လောဘရမ္မက်
သက်ပြင်းချရ အခါခါ --။

မကောင်းမှုကို ချိုမြိန်စွာသောက်သုံး
ယစ်မှုးနီကတ်သူများ
ဝင်းကြွားမင်းမူ အောင်လံထူလျှက် --။

အဆိုးအညှက် အမှိုက်သရိုက်တိကို
တိုက်စားပစ်ဖို့
တော်လှန်ရေးမြစ်ရီခမ်းခြောက်
မျက်တွင်းဟောက်ပက် လူမမာ --။

နာရီစက်ဝန်း၏မိနစ်စက္ကန့်ရို့သည်
အခိုက်အတန့်လိုက် ကုန်ဆုံး
နီလုံးညိုညို ညရိပ်ခို --။

အတ္တ အတ္တ
အတ္တ အမှောက်ထု တွင်းနက်အောက်
တယောက်ပြီးတယောက်
ဒိုးယိုပေါက် တောက်လျှောက်ကြီးဆင်း
ခွာသံပြင်းပြင်း --။

နောက်ကျိကျိ အမှောင်အတိပြီးသော
ငရဲအိုင်ကြီးထဲက
လွတ်လမ်းမဲ့ ငါးချေတိပိုင်
ကျုပ်ပုတ်ရည် ညစ်ညမ်းသည်ရာ
အသက်ရှင်ရာလား
လွတ်မြောက်ရာလား --။

အရောင်နှမ်းနှမ်း မွဲခြောက်ခြောက်
လိုင်တံတို ပျိုင်းအိုတချို့ကလည်း
ပွက်သည့်ငါးကို အလိုက်ချောင်း
အကြောင်းအားလျှော်စွာ --။

ဘုရားသခင် ဖန်တီးထားသည့်
ဤကမ္ဘာမြီကြီးသည်ကား
ဒုက္ခအတိမွှမ်း
ဆိုးသွမ်းလှပါဘိတကား --။.

ပူလောင်ထန်ပြင်း
ဆင်းရဲလှပါဘိတကား --။

အပူမီးများချုပ်ငြိမ်း
အီးချမ်းသော အနာဂါတ်
မိုးထက်ကောင်းခင်
စကြာဝဠာတခွင်လုံး
လှပသာယာ ကြည်လင်လာဖို့
ရတနာမိုး ပေါက္ခရ၀ဿမိုး
ထိန့်ကြိုးရွာသွန်း
လောင်းဖြန်းပီးပါဖိလော့ --။

............
(သာလှဦး)
29/5/2000

ညက တော်လှန်ရေးကိုရောက်

ညက တော်လှန်ရေးကိုရောက်
သွားပေါက်စ ခွီးချေတိ
ညီညွတ်ရေးဆို ပုသင်ညို
လိုင်ကိုလှုတ်လှုတ်
ခလိမ်ယှုတ် ---။

ညက တော်လှန်ရေးကိုရောက်
သွားပေါက်စ ခွီးချေတိ
တော်လှန်ရေးဆို တောထဲခို
ဂြာအိုလည်းကျ
လက်နက်ချ ---။

ညက တော်လှန်ရေးကိုရောက်
သွားပေါက်စ ခွီးချေတိ
ရဖျူဂျီကို မလိုဆို
မလိုဘဲလျှောက်
နတ်ပြည်ရောက် ---။

ညက တော်လှန်ရေးကိုရောက်
သွားပေါက်စ ခွီးချေတိ
တုံးပိုင်းကိုကိုင်
ဆောင့်ခြောင်ထိုင်
တုံးပိုင်းလည်းကျိုး
ဂျွမ်းလည်းထိုး ---။

...................
မောင်ပေါက်
(ရခိုင်ပြည်)

သဇင်သတ္တိ

နယ်ပယ်တခု၊ ကိုယ်စားပြုလျှက်
နှိုင်းထူပုံထင်၊ မြတ်သဇင်သို့
ပင်ယံမြင့်မြင့်၊ မာန်ချီဝင့်ပြီး
ဖူးပွင့်ဝီဆာ၊ မွှီးကြိုင်စွာလျှင်
မြလွှာတမူ၊ ပန်းမိဉ္စူတည်း ---။

လူမျိုးရခိုင်၊ ပြည်မဏ္ဍိုင်တွင်
သာကီနွယ်မြတ်၊ တိုင်းလေးရပ်၏
ပြုမှတ်တံဆိပ်၊ အောင်နိမိတ်ဖြင့်
ရက္ခိတမည်၊ မျိုးဂုဏ်ရည်ဖြင့်
စည်ပင်သာယာ၊ သာသနာနှင့်
ကမ္ဘာ့အလယ်တွင်
ထည်ဝါရပ်တည် ဟိလတ်၏ ---။

ရပ်တည်ထည်ဝါ၊ မျိုးမဟာကို
မိစ္ဆာဝင်ရောက်၊ သစ္စာဖောက်ကြောင့်
နန်းပျောက်ထီးပျက်၊ စစ်ဒဏ်ချက်နှင့်
သက်ပေါင်းလည်းခ၊ ကျွန်ဖြစ်ရ၏
ဘ၀ယှုံးနစ် ---
သက္ကရာဇ်နှောင်း၊ သမိုင်းကြောင်းကို
သွန်းလောင်းထုဆစ်၊ အားမာန်သစ်ဖြင့်
ဖက်ဆစ်၏ရန်၊ တိုက်တွန်းလှန်မည်
တာဝန်အသိ၊ အားလုံးဟိ၏
ကတိခိုင်မြဲ၊ လက်ချင်းတွဲ၍
အောင်ပွဲတဖန်၊ ကိုယ်ပြန်ရယူ
ပြိုင်တူရှိသို့ လှမ်းချီတက် ---။

အို -- ရက္ခတိုင်းသား၊ မျိုးချစ်များရို့
ရှိသို့တူပြိုင်၊ လှမ်းတက်နိုင်ရေး
ငိုင်ငေးတွေဝေ၊ ထိုင်နီရေလား
နောက်ထားကျန်လိုက်၊ ထိုစနစ်မှ
ကူးပြောင်းသည့်ခေတ်၊ အမှီလိုက်လို့
နည်းသစ်ပညာ၊ ဆည်းပူးကာလျှင်
ပြည်ရွာကောင်းကျိုး၊ ထမ်းပိုးရွက်ဆောင်
မုက္ချအောင်မည်
ရွှီရောင်ဝင်းပ အနာဂါတ် ---။

ဝီဆာခန့်ငြား၊ မာန်ဝင့်ကြွားလျှက်
ထင်ရှားမျိုးမှန်၊ ဇာတိမာန်ဖြင့်
ညှာတံမကျိုး၊ ကြွီမညှိုးအောင်
ပျိုးထောင်ကာလျှင်၊ ခိုင်သဇင်ကား
ရှိတွင်မားမတ်၊ ဦးတည်ရပ်လျှက်
သတ္တိစွမ်းရည်ပြတော့မည် ---။

..................
မောင်သာလောင်းဖြူ (ရမ်းဗြဲ)

ဆရာတော်ဦးဥတ္တမ

သူ့ကျွန်သဘောက်၊ နယ်ချဲ့အောက်မှ
လွတ်မြောက်ဖို့ရန်၊ စိတ်အကြံဖြင့်
နိုင်ငံမြောက်မြား၊ ခက်ခဲကြားက
လားရောက်လေ့လာ၊ ကြိုးပမ်းပါသည်
အာဂမျိုးချစ်ဆရာတော် --။

သူ့လူမျိုးခြား၊ စာစကားကို
သင်ကြားတတ်လွယ်၊ သိနားလည်မှ
နယ်ချဲ့အကြံ၊ စိတ်ထားမှန်ကို
အမြန်ဆုံးသိ၊ ခံယူမိ၍
ရောက်ဟိနီရာ၊ ဘာသာစကား
မြောက်အမြားကို၊ သင်ကြားလေ့လာ
တတ်မြောက်ပါသည်၊ အာဂမျိုးချစ် ဆရာတော် --။

ရောက်သည့်နိုင်ငံ၊ ၀ီးရပ်ဌာန်မှ
ဝံသာနုစိတ်၊ မျိုးချစ်စိတ်ကို
ယိုဖိတ်စီရန်၊ စိတ်ထက်သန်လျှက်
မြန်မာပြည်အား၊ စာရွီးသား၍
ကြီးမားစေတနာ၊ သွန်းဖြိုးရွာသည်
အာဂမျိုးချစ်ဖြစ်ပေသတည်း --။

ကျွန်စိတ်ကင်းပျောက်၊ မမှုကြောက်ပဲ
လွတ်မြောက်ခရီး၊ လမ်းညွှန်ပီး၍
ဖမ်းဆီးပြစ်ဒါဏ်၊ များစွာခံလည်း
နိုင်ငံအတွက်၊ ယုံကြည်ချက်ဖြင့်
ထက်မြက်စွမ်းဆောင်၊ ထွန်းလင်းပြောင်သည်
ဂုဏ်ရောင်နီသို့တောက်၏တည်း --။

........................
မင်းရွှေမင်း (အင်းစိန်)
ရခိုင်မဂ္ဂဇင်း အမှတ် (၂၅)

မှတ်ချက်။ ။ ရခိုင်မဂ္ဂဇင်း၌ မြန်မာဘာသာဖြင့်ရွီးထားသည်ကို ရခိုင်ဘာသာသို့ပြန်ဆိုထားခြင်းဖြစ်ပါသည်။

ရိုးမတဖက်က ငါ

ရခိုင်ရိုးမ၊ ဟိမ၀န္တာ
တောင်မဟာမှ၊ ခက်ဖြာသွယ်တန်း
ပင်လယ်ကမ်းတိုင် --။

နွယ်ချိုရိုးမ၊ မြောက်မှတောင်သို့
ညိုမှောင်မှိုင်းမှိုင်း၊ အလှိုင်းလှိုင်းဖြင့်
တံတိုင်းထီးထီး၊ မြင့်မားကြီး၏
ဆီးကာရံတား၊ နဂါးတောင်နှယ်
တောင်ငယ်တောင်ထိပ်၊ မြုံခိုးလိပ်နှင့်
အရိပ်မြင့်မိုရ်၊ ကောင်းခင်ညိုဖြင့်
မအိုရုပ်ဆင်း၊ နုပျိုခြင်းဖြင့်
မာန်တင်းရိုးမ၊ ကြည့်မ၀တည်း --။

ပင်လယ်ကမ်းနား၊ ရခိုင်သားရို့
အားသစ်ခွန်သစ်၊ သမိုင်းသစ်ဖြင့်
ဖွင့်လှစ်ကဏ္ဍ၊ နိုးကြားကြမြဲ
ရက္ခိုင်နာမ။ ထိန်းသိမ်းကြမြဲ
ဘ၀မမိ၊ မျိုးမမိဘဲ
အမိဘာသာ၊ သာသနာကို
တွယ်တာမြတ်နိုး၊ အမျိုးချစ်စိတ်
အရိပ်မထိုး၊ ဂုဏ်မညှိုးအောင်
ပန်းပျိုးလက်များ၊ နှလုံးသားမှာ
လှုပ်လျှားသွီးနီ၊ စည်းလုံးညီ၏ --။

ရခိုင်ရိုးမ၊ တဖက်ကလူ
ငါရို့မူလျှင်၊ ပင်လယ်မမြင်
လှိုင်းမမြင်ဘဲ၊ သဲပြင်ငွေသောင်
ကျောက်ဆောင်ကျောက်တန်း၊ သန္တာကမ်းနှင့်
လခြင်းဒေသ၊ မိနီကြယင့်
ဘ၀အသိ၊ အမျိုးသိလော့
အမိမွီးမြီ၊ အခြီမချ
အနီကျသော်၊ ကိုယ်ကရခိုင်
မျိုးစောင့်နိုင်လား၊ ရက္ခိုင်နာမ
ထိန်းနိုင်ကြလား
ရိုးမက တောင်နှင့်မြောက်
အနောက်နှင့်အရှိက ငါရို့
အမျိုးချစ်ဖို့လိုသည် --။

..................
မောင်ကြင်နွယ်
ရခိုင်မဂ္ဂဇင်း အမှတ် (၂၅)

အမျိုးချစ်စွာမှာလည်း မြန်မာစကားဖြင့်မချစ်ဘဲ ရခိုင်စကားဖြင့်ချစ်ရန်လည်း လိုအပ်မည်ဟုထင်ပါသည်။ မှတ်ချက်။ ။ ရခိုင်မဂ္ဂဇင်းဟုခေါ်သော မဂ္ဂဇင်း၌ မြန်မာစကားဖြင့်ရွီးထားသည်ကို ရခိုင်စကားဖြင့်ပြန်ဆိုထားခြင်းဖြစ်ပါသည်။

Friday, May 29, 2009

အလိုတော်ရိများသို့

မြန်မာအငုတ်ကို
အဟုတ်ဟုထင်
လုလင် ဘ၀င်မြင့်မြင့်
စပ်ငြင့်ငြင့်
ဝမ်းကြင့်နီပျာလား --။

................
(သာလှဦး)

ငါးဈီးတန်း

စစ်တွေ ကမ်းနားလမ်းက
ယင်ကောင်များစုဝဲရာ အရပ်ကို
အမှိုက်ပုံဟုခေါ်ပါသည် --။
.........
သာလှဦး

သင်္ခန်းစာ


လှပပြိုင်းပင်
ရွက်သစ်ဆင်လည်း
ညောင်ပင်ကဖျက်
ကျ(ကျီး)ဘောင်းကြက်က
မူလသစ်ပင်
သီပွဲဝင်ပနာ
သစ်ပင်လည်းပြုန်း
မျိုးလည်းတုံးရေ...။

...............
Ven.Eindobhasa

၂၉-၅-၂၀၀၉

၁၆:၂၅ pm

Thursday, May 28, 2009

မတတ်သာလို့ရာ

ခွီးသူတောင်းစားတိက
ငရို့ပြည်ကိုလာအုပ်ချုပ်
လူလုပ်နီကတ်တေ --။

သူရို့တိက
အနူလက်နန့်
ရွှေခွက်ကိုင်ချင်နီကတ်တေ --။

သောက်ပုံမလာရေမျက်နှာနန့်
ခွက်စားတိ --။

အကုသိုလ်ရုပ်နန့်
အယုတ်တမာတိ --။

အခုကျမှ
ငိုပြတတ်ကတ်တေပင်
ကကောင်း
သနားဖို့ကောင်းလှပါ၏ --။

ကွကွကွကွ
မျောက်မအိုနာတိ --။

အားနာပါယင့်
မင်းရို့ပါးစပေါက်ကို
ဂွမ်းဆို့ထားလိုက်ချင်ရေ --။

........................
(ခတ်ကျောက်သီး)
မေလ (၂၅) ရက်၊ ၂၀၀၂ - ခုနှစ်။

သွီးထပ် မှာတမ်း

သံ တိုတ္တာထဲက
ပန်းလိပ်ပြာဝိညာဉ်တစ်ကောင်
သမရိုးကျ မဟုတ်
ရစွာနိန်ရာက စထားရေ
ဇာတ်လမ်းတစ်ပုဒ် ...။

အရည်မရ ၊ အဖတ်မရ
အိပ်ရာဝင် စိတ်ကူးယဉ်
အိမ်မက်တိအောက်
သမိုင်း မ၀င်နိုင်ရေ
ဘ၀ပိုင်သျှင်တစ်ယောက် ...။

လှိုင်းလီ ကြီးရေ
ပင်လယ်ပြင်ကြီးကို
ဖောင်လုပ်ထားရေ
ဝါးဆယ်လုံးနန်.
စိမ်ခေါ်ဝံ့ရေ
အညတြအရက်သမား ...။

ဖမ်းဆုပ်လို့မရရေ
အနာဂတ်တိကို
တစ်ထစ်ချင်းမတက်ဘဲ
ကျော်တက်ဖို့စိတ်ကူးကေ
ခါးရိုးကျိုးစွာ အတန်ကျသိမ့်ယင့် ...။

အတိတ်နန့်အနာဂတ်ကို
လက်ခုပ်သီးခတ်
လတ္တံ့တိကို ခနှုန့်သတ်ပနာ
လက်ဟိအချိန်ကို
ပေတံ နန့်တိုင်း
ယုံကြည် ချက်ကို
ဇမ်းပွတ် ကိုင်ကေ
ကကောင်းမ၀ီး ဒေ ...။

..................
အေးမောင်(ရင်အုံတော်ဓာတ်)
၂၉၊၀၅၊၂၀၀၉(၀၁:၀၀)

ဘဏ္ဍာ

ကြားလာ…
ထွေတောင်ထိပ်က
အညှောက်ပေါက်ဇာတီတိ
ပြောပြနိန်ရေစကား…။

ကြားလာ…
လက်ဆည်ကန်ရီပြင်
ညင်သာလီညှင်းဖိတိုး
ရိုးအီမလားရေ
သီခြင်းစာသားတိ…။

မြင်လာ…
အတိတိက
အိပ်မက်ဖြစ်လီရဖို့လား
ထွေကျောက်ထက်စာတိ
တည်ဟိလီသမျှကာ…။

မြင်လာ…
အတိတိကို“ဇစ်”ဖြုတ်
ရင်ဖွင့်အထုပ်ဖြီပြရေ
နန်းတော်ခြီရာကို….။
.................

အရိုင်း၊ မြို့ဟောင်း

မြောက်ဦး

ရိုးမချက်ကြွီ၊ သန္တာမြီဖွား
နဒီကစ္ဆပ၊ အဉ္ဇလွင်ပြင်
ရင်ခွင်မှာကြီး၊ ချစ်သားထွီး…။

သမိုင်းတခေတ်၊ မော်ကွန်းသစ်ကို
ဖွင့်လှစ်ကမ္ဗည်း၊ ထိုးလီဗျာယ်…။
မျိုးဂုဏ်ဖြိုးမောက်၊ ထီးနန်းဆောက်လို့
ထွန်းတောက်ကမ္ဘာ၊ ကျော်လီဗျာယ်…။

ရက္ခိုင်အောင်လံ၊ ဇာတိမာန်ကို
တိမ်ယံမိုးထိ၊ လွှင့်လီဗျာယ်…။

ရိုးမသားကောင်း ဘဝပြောင်းလဲ
ရှိဟောင်းမွီနှစ်၊ ရတနာစစ်ရို့
ဆန်းသစ်ကြီးကျယ်
ခမ်းနားထည်တုံး၊ ဝင့်ကြွားတုံး…။

အို…ချစ်သားထွီး…
နင်ကားမသီ၊ ဒေရီမြီမှာ
တည်အံ့ကမ္ဘာ၊ တိုင်လိမ့်တည်း…။

……………..
တက်ထွန်းနီ-မြောက်ဦး

(မှတ်ချက်။ ။“ခမ်းနားထည်တုံး၊ ဝင့်ကြွားတုံး…” ၌ “တုံး”ဟူသောအဓိပ္ပါယ်သည် “အသုံးမကျ၊ ပြီးဆုံးလားသည်၊ မျိုးတုံးလားသည်” စသည်မှာသာလျှင်သုံးသင့်သည်ဟု ဦးဇင်းထင်မြင်မိပါသည်။ ယင်းအတွက်ကြောင့် အထက်ပါစာပိုဒ်သည် ယင်းအဓိပ္ပါယ်မျိုးကိုဆိုလိုခြင်းမဟုတ်ဘဲ “ဆက်လက်ပြုလုပ်ခြင်း၊ ဆက်လက်ရှင်သန်ခြင်း” ကိုဆိုလိုသောကြောင့် “ခမ်းနားထည်တုံး၊ ဝင့်ကြွားတုံး” အစား “ခမ်းနားထည်တုန်း၊ ဝင့်ကြားတုန်း” ဟုသာသုံးသင့်သည်ဟုဦးဇင်းယူဆပါသည်။)

Ven.Eindobhasa

အမှတ်တရ

မင်းထီးဘုရာင်
နန်းသက်ကုန်ခါ
လက်ညှိုးကမပါ…။

အင်္ဂုလိမာလလေ့
စကနန့်ရာညှပ်
ဖြတ်ချင်ဆီဖြတ်
ညှပ်ချင်ဆီညှပ်လီ…။

နန်းတိုင်ကထုံးဖြူ
မုန့်လုံးမှာစက္ကူကပ်
လက်ညှိုးနံ့ထွက်လာရေ…။

အဘာအဘာ
မင်းကြီးနန့်သမင်
ခင်နိန်လို့တော်သိမ့်ယင့်…။
………………..
နောင်ရဲခိုင်

မျိုးနန့်ပိုး

၁)
အနောက်လီမှာ
ရွင့်ပါလာရေ
ဒေါ်လာတရွက်…။

(၂)
ဒေါ်လာတရွက်
မက်လောက်တေထော
ရမက်ဇောငင်….
“အမျိုးသီလ
နှစ်ဌာနကို
စောင့်ထပိုင်ပိုင်…
ရခိုင်တံဆိပ်
ဖြုတ်ဆိပ်ကေထင်…။

(၃)
ဂန္ဓဝင်စံထား
ရင်မှာခံစားဗျာ
မစားရ ငတ်ပတ်စီ
မသီသရွိ
ဇာဒုက္ခတွိတွိ
ဇာတိတချက်
အပျက်မခံ
ဆီးမပြယ်ပန်းမညှိုး
မျိုးမှာပိုးမထိုးစီရ
“ရခိုင်သမ
ရခိုင်သမ
ရခိုင်သမဟိတ်”လို့
ထဗျာယ်ဟောပလိုက်ဖိ…။
…………..
နတ်မြစ်လှိုင်းပြာ

(ဒေါ်လာစစ်မြီပြင်မှာ တိုက်ပွဲဝင်နိန်ကတ်တေ အမျိုးကောင်းသမီးရို့အတွက်ဂဏ်ပြုပါရေ။)

တာဝန်ကျီ

ကိုယ့်သားကိုယ့်သွီး
နီးရာပီးပါ
မွီးဖွားကြီးပြင်း
အချင်းချင်းတိ…။

စကားလီသံ
ကွဲစွာမှန်လည်း
အမှန်စိတ်ထား
တသွီးသားတည်း…။

လူမျိုးမပျောက်
မိန့်မပျောက်ဖို့
တစ်ယောက်ကိုယ်စီ
တာဝန်ကျီအောင်
ရောက်နီရေရပ်
စွမ်းဆောင်ကတ်မှ
ရခိုင်ပီပီ
တာဝန်ကျီ…။
………………
အောင်မြတ်၊ ယိုးတရုတ်

မြောက်ဥမြို့ကိုရှုမျှော်သော်

ရခိုင်သမိုက်၊ ကနက်စိုက်
မြောက်ဥခေတ်ကို၊ မြင်ယောင်ရေ..။

မြို့ရိုးနန်းက၊ ကျီ-ပြ၊ တံတိုင်း
အံ့လှိုင်းကျုံမြောင်း၊ ခံတပ်ပေါင်း
တင့်တောင်းအင်အား၊ ဝင့်ကြွားဖွယ်...။

တောင်စိုင်ရံပတ်၊ မြီမလပ်
ထွဋ်မြတ်သရီ၊ ပဏာညီ
မွန်ချီလှပ၊ သာစွာလေ...။

ရခိုင်ညွန့်ဖူး၊ မြောက်ဥမှန်ကင်း
အာဏာချင်းရေ၊ ပြည်ထောင်မင်း...။

ဖက်ကင်းတုနှိုင်း၊ ခံ့ကျိုင်းအကျော်
မဟော်မြတ်ညာဏ်၊ ဖြိုးပြည့်ရံ
ရွှီလျံရောင်ခပ်၊ အံတမွတ်...။

ရခိုင်မြောက်ဥ၊ မွန်ကြည်မြူး
ဧလျက်ပျံ့ပျူး၊ ကြည်နူးရေ...။

ချီးကျူးအံ့သြ၊ သာတမော
တွက်စားမိန့်မော၊ ကျွန့်မနော
စောစောလွန့်လူး၊ လှိုင်းဂယက်မူး
ဝမ်းနူးမပြယ်၊ နိဒါန်းသွယ်
ရင်ဝယ်ခံစား မိခရေလ..။

မြောက်ဥတစ်ဖြစ်၊ ထွန်းပေါ်လှစ်ကေ
ရင်နှင့်ပျော်မြူး၊ ဖော်ကျူးရရေ...။

......................

နတ်မြစ်-စန်းအောင်

လီညှင်းမရိုင်း မုန်တိုင်းမသင်း

ဘုရင်မင်းဘာကြီး
မာစီဒီးမစီးခရစွာ
သရော်စရာလား…။

လေဒီဒိုင်ယာနာ
လျှာပူအာပူမစားဖူးခ
ရှုတ်ချစရာလား…။

မာစီဒီမစီးရကေလေ့
မင်းဘာကြီးဘဝမှာ
ကန်ကမကန်စည်းစိမ်တိ
ဂုဏ်ရှိန်မလျှော့….။

လျှာပူအာပူမစားရကေလေ့
မိဘုရားလောင်းဒိုင်ယာနာ
လျှာအရသာခံစရာ
အရာစွာတိအပြည့်….။

သူ့ခေတ်သူ့အခါ
သူ့နိန်ရာသူ့ဒေသ
ဒေချင့်ကအဟိ
ထိုချင့်ကိုမသိ
မဟိကာယေကေ…..လို့
ရှည်လျှားပေတံ၊ အခြီခံနန့်
ဝေဖန်စရာမလို
တဖက်မြင်အပျက်တိနန့်
ငယ်ထိပ်ကိုဖနောင့်တိုက်
ကထိုက်ကရိုက်စွပ်စွဲ
အယူကွဲခံ၊ အငြင်းသန်ရေ
ပေတံအဆိုး….။

ဖဲ့ချိုးဝေးပလိုက်
ခေတ်စနစ်အချိန်အခါ
ကာလဒေသပယောဂကို
အလှပချိန်ဆ၊ နားလည်ရဖို့
မျှတလျော်ကန်၊ အယူမှန်ရေ
ဝေဖန်ရေးလီညှင်း
ပန်းသသတင်းဆောင်ပနာ
လောကပြတင်းကိုဝင်လာနိုင်ဖို့အတွက်
နက်ဖြန်ခါ မုန်တိုင်း…။


(မှတ်။ ။ “သူ့နေရာသူ့ဒေသ” ကို “သူ့နိန်ရာသူ့ဒေသ”
“ရှည်လျှားပေတံ၊ အခြေခံနန့်” ကို “ရှည်လျှားရေ ပေတံ၊ အခြီခံနန့်” လို့ပြောင်းသုံးလိုက်ပါရေ။
ကဗျာချစ်သူ)
………….
စစ်တွေညိုသန့်

ဝီးလွင့်အိပ်မက်

ဖိုးခေါင်တောင်ထက်မှာ
မျဉ်းဖြောင့်တကြောင်း
ဆွဲကြည့်ကတ်ဖို့ဆိုကေ
အကို ဇာနိန်ရာမှာမဆို
ပါဖြစ်အောင်ပါပါဖို့ဆို…။

ပင်မြင့်ထက်ကငှက်
အတောင်ကျွတ်ငှက်တော့
မဟုတ်ပါနှန်း အကို…။

ရီးလာဖို့အတွက်
မြောင်းသျှေဖောက်
ပေါက်တူးသျှေပေါက်လို့
စောင့်ကတ်ရဖို့ဆို…။
ဒေါသတရာ….
မာနတရား….
ဥပေက်ခါတရား….
ငြိလားရေဆိုကေ
ကျွန်တော်လေ
မြောင်းဘောင်သျှေထက်ကဖြစ်ဖြစ်
သစ်ခြောက်ပင်အောက်ကဖြစ်ဖြစ်
စောင့်နိန်မေနှန်း…။
……………….
နောင်ရဲခိုင်

မျှော်ပါယင့်လည်း မောင်တော်ကမလား

အိုဘယ်သာစွ
တောင်စွယ်ကြားမှာ
တိမ်ယံတိမ်တောက် ရောင်ခြယ်ဖြာသော်
ချစ်သူသက်လျှာ ဆောင်တော်ကူးချိန်မို့....။

စုံဖွယ်ချက်ပြုတ် ခင်းကျင်းပြင်ဆင်
ခန်းဝယ်ပန်းခင်း သင်းရနံကြိုင်လို့
ထိန်ထိန်သာ မီးတိုင်းအောက် လိုသည်မယ်မဟိရ
စီမံကာ ဖြည့်လို့ ၊ တစ်ဆောင်လုံး ဗျာများ
အကြိုတောက်ပို စောင့်လိုကြိုစီရေ...။

လာသူလမ်း အညောင်းဖြေ စိတ်တော်ပြယ်လန်းစီးဖို့
မီးကျောင်းစောင်းလက်သံ
ခမ်းဝယ်ယံ ညံဟိန်းလို့
သံသာတေးဆက် ပန်းကော်ဇောနီဖြင့်
ီရီတော်ဆက် ကပ်စီရေ...။


အိုနှမ ငါကိုယ်တိုင်
စွမ်းသလောက် ဖီးလိမ်းလို့
မြပ၀ါအစိမ်းရောင် စိန်မှုန်ရော
လှပါယင့်လားချင့်......။

ပန်းရင့်ရောင် အချိတ်ထက်
ရွှေခြေထိုး လွန်းရာချိတ်က ပိုလှနှီဖို့လား
ယဉ်စစ ပုလဲကွန့် နံသာသွီး အဆင်ပေါ် ပိုးပုဝါ ထပ်ကာဆင့်
သောကများ ဗျာပါ မမောနိုင် မပမ်းနိုင်
ပန်းနံသာ မိတ်ကပ်ကူလို့
ပါးသွီးနီင်္နီင်္ ဗိုလ်ပြည်ဖြစ် သုံးလို့ရာ
လှစီအောင်မရှက်အား
တွေးရုံနှင့်မပြီး စမ်းဝတ်ရ ချွတ်ရလိုက်နန့်
အချစ်တော် ပိုခလီပါရေ...။


အိုဘယ်မောင်တော်
ဇာကိုရောက် ဇာကိုပေါက်လို့
ခရီးတော် ကြန့်ကြာနီပါလေ
စည်သံတောင် ကြားရဗျာလ်
စားဖိုဆောင် မီးလည်းတိတ် အဆောင်တောင် ပိတ်ဗျာလ်
အီးနီရေ ထမင်းဝိုင်း ညိုးနီရေ ပန်းကြားမှာ
မလှုပ်ဝံ့ သစ်လွင်ရေ ၀တ်ရုံဖြင့်
အရှက်ရစီအောင် အထိန်းတော် မိတ်သံ ကြားမှာ
မဖော်သာ ငိုမယ့်မျက်နှာ ၀ှက်လို့ အသည်းမှာ လွမ်းနာကျ
စိမ်းရက်သူကို အမုန်းတော်မ၀င်ဝံ့ဘဲ
အိပ်ဆောင်တော်ကို ကူးရရေ...။

ချစ်စကားဆိုမည့် နှုတ်ခမ်း နီသွေးရေ နှစ်လွှာက
“အရီးမိုးဒါဖြူ ထမင်းဝိုင်းသိမ်းလိုက်”
မျက်နှာတော်လွှဲ မကုန်ရေစိတ်နန့်
အီးစက်ရေ ထမင်းဝိုင်း လားနိုးနန့် မျှော်သူအပြစ်
စည်ဗဟို သုံးချက်အတီး ရင်ထဲက စကား
အေနီလည်း မောင်တော်မလား … ။

..............
စောစစ်

လွမ်းပါယင့်လည်း အလွမ်းညက မကုန်နိင်

ဘုံယံဖျား ကြယ်သီပါလို့
ဆည်းသံသာသာ ညယံအခါ
မဖြေသာ စိတ်တော်ငယ် နွမ်း
မြတ်ဘုရားဆောင်တော်လှမ်း
ပန်း ရီချမ်း ဆီမီး ပူဇော်ပါလည်း
မပြေရေ အလွမ်း
မငြိမ်းရေ ရင်ခွင်
မြတ်ဘုရားရှေ့မှောက်
လက်ဆယ်ဖြာ ထိပ်မှာတင်၍
ခိုကိုးရားမယ့် တောင်းဆုတော် ပြုမိရေ...။


ဖဲမွေ့ရာ ညောင်စောင်း
သလွှန်က မာတောင့်နီလိုရာ
တောင်တစ်ဖက် မြောက်တစ်လှည်း
သက်ပြင်းက အကြိမ်တစ်ရာ လှူးလို့ရာ
အိပ်မပျှော် ရင်မှာ အလွမ်းပို စွာထင်...။


သည်းခြေပင်ထိတ် ညယံဝယ် ဆိတ်ပါလို့
တစ်ကိုယ်တော် အလွမ်းအိုင်းဖွဲ့
ရတုတော်ဖွဲ့ပါလည်း စိတ်တော်မရွှင်
ကိုယ်ပုဝါ မျက်ရည်တော် စိုရွဲ့လို့
မကြင်သူ စိမ်းလေသူကိုမှ
လွမ်းစ်ိတ်တော်ပို လို့
အာရုံကို မျော်…။

“မျက်နှာတော် သစ် ၀တ်ရုံတော်လှဲမယ်
ထမ်းစင်ကို ပြင်ကြစမ်း”
ငါထိပ်ထား စောစစ်
မျောက်သားတော်ဆီ အခစား ၀င်မယ်။

...................
စောစစ်

Wednesday, May 27, 2009

ရခိုင်သားသို့

အို…ရခိုင်သား
မင်းကိုယ်တိုင်က
“နီ”မင်းကြီးတဆူဖြစ်ယင့်သားနန့်
အီးစက်နိန်ရရေ
ဘဝစုပ်ထဲမှာရာ
မင်းနိန်လို့ပျော်ရေလား…။

အို…ရခိုင်သား
မင်းကိုယ်တိုင်က“လီ”ဖြစ်ယင့်သားနန့်
ချွဲလုံးတိတဖြိုင်ဖြိုင်ကျနိန်ရရေ
ဘဝစုပ်ထဲမှာရာ
မင်းနိန်လို့ပျော်ရေလား….။

အို…ရခိုင်သား
မင်းကိုယ်တိုင်က
“လမင်း”ကြီးတဆူဖြစ်ယင့်သားနန့်
ပူလောင်၊ မှောင်မိုက်နိန်ရေ
ဘဝစုပ်ထဲမှာရာ
မင်းနိန်လို့ပျော်ရေလား…။

အို…ရခိုင်သား
မင်းကိုယ်တိုင်က
“ခြင်္သီး”တကောင်ဖြစ်ယင့်သားနန့်
မြက်စားလို့နိန်ရရေ
ဘဝစုပ်ထဲမှာရာ
မင်းနိန်လို့ပျော်ရေလား…။

အို…ရခိုင်သား
မင်းကိုယ်တိုင်က
“ကျား”တကောင်ဖြစ်ယင့်သားနန့်
ခွီးကိုရာကြောက်နိန်ရရေ
ဘဝစုပ်ထဲမှာရာ
မင်းနိန်လို့ပျော်ရေလား…။

အို…ရခိုင်သား
သေချာစဉ်းစားပါ
ယင်းဘဝစုပ်တိထဲမှာရာ
အသက်ထက်ဆုံး ဘဝတုံးအောင်
ဇာတ်မြှုတ်ဖို့လို့ရာ စဉ်းစားပါကေ
လောကပြောင်းပြန် ဖြစ်လားဖို့…။
………………

Ven.Eindobhasa

၂၇-၅-၂၀၀၉
၈:၄၆ am

စာပီလက်

စိမ်းဖတ်ရင်ဖတ်အိမ်မက်တိ
၂၁ ရာစု ရောင်စုံညဥ့်မှာ
ကြွီကျနီရယင့်…။

မျက်ရီတိ စီးနီရေ မြစ်
သွီးနန့် ထုဆစ်ထားရေ လယ်ကွင်းတိ
ပဋိပက္ခလီပြင်းတိုက်နီရေ
ဒေ ပဂျီကားချပ်ကို
သမိုင်းနန့် ဆွဲထားရရေ…။

မခင်းရသိမ့်ရေလမ်း
မလားရသိမ့်ရေ ခြီလှမ်း
(မလှမ်းရသိမ့်ရေ ခြီလှမ်း)
ပန်းတိုင်စခန်းကို မှန်းပနာ
နီဝင်ညဇာ
ဘ၀တိ တို တိုပါလတ်ဗျာယ်…။

ရင်ဖတ်အထူအပါး
ခံစားတတ်မှရာ နားလည်
စကားလုံးအတိမ်အနက်
စာမျက်နှာမှာ သက်သီပြ
မျှော်လင့်ချက်ကို အရောင်တင်
စာပီပလ္လင်မှာ
အနာဂတ်ကိုပုံဖော်ဖို့
ငါရို့ လက်တိ
ငါရို့ လက်တိ
တာဝန်အသိနန့်
ယုံကြည်လားကတ်မေ…။

...................

ဝံလက်ဖြူ
၂၇၊၀၅၊၂၀၀၉

Tuesday, May 26, 2009

အယင်ကျီ ပါဖိ

တဖြိန်းဖြိန်း တက်ပါလတ်တေ
အနာဒဏ်ရာဟောင်းတိ
တွေးကြည့်လီတိုင်း
ရင်ပွင့်အောင်
ခါးသီးရေ ...။

ကဝေအတက်နန့်
အောက်တန်းစား
လှည်းဖျားမူတိအောက်
ရိုး အ,ရေ ငရို့တိ
ဆားမရ၊ ရီမရ ခံဖိ ...။

စိတ်နာတက်အောင်
သင်တန်းပို့ချမှုတိ လိုအပ်နိန်ရေ
"ငါ" ဆိုရေလူတိကလေး
အယင်က ဒဏ်ရာဟောင်းတိကို
မီးနန့်ထိုးနိန်ကတ်သိမ့်ယင့် ...။

ပင်လယ်ပြင် ညဥ့်မှောင်အောက်
ကြောက်ကောင်း ထမန်း
လှည့်စားမှုတိအောက်က
လူနာနန့်ဆီးသမ(သမား)
မလောက် င,ရေ ငရို့ဘ၀ ...။

ကျယှုံးသူရို့ဘ၀မှာ
ဆားငန်ရီနန့်
ရီတိုက် စွာကို ခံခါ ခံ
ပျားရည်နန့် ၀ါးချစွာကို
ခံခါ ခံနန့်
ကြာလာကေ“ဗျ”ကျန်ယာ ...။

တောယှင်းဖို့ လာရေပိုင်ပုံစံနန့်
ဇာတီဌာပနာ ဖောက်ယူလားရေ
ဒေ လူဆိုး၊ သူခိုးတိ
ဖောက်ပြန်မူတိ အောက်က
ငရို့ဝဋ်ကြွီးတိ
ဇာခါ ကျီဖို့လေ့ချင့် ...။

..............
အေးမောင်(ရင်အုံတော်ဓာတ်)
၂၆၊၀၅၊၀၉( ၃၂:၃၆)

ငွေသောင်ယံခံစားမှု

ကမ်းရိုးတန်းကို
လွမ်းရေ --။

လှိုင်းကျောက်ဆောင်
ငွေကမ်းသောင်ပြင်က
သဲဖြူစင်တိကို --။

မျက်စိထဲစွဲ
ချစ်ဖို့ကောင်းစွာတိကျည်း
တမ်းတ၀မ်းနည်းယင်း
လွမ်းယင်း ငေးယင်း --။

ကြည့်မဆုံး
လှိုင်းတိ တလုံးပြီးတလုံး
တ၀ုန်းဝုန်းရိုက်
မုန်တိုင်းတိုက်သောခါ
ငွေလွှာဖြူစ
သဲရွရွ
ဖုန်မထဘဲ
ကမ်းကလွင့်ပျောက်စဉ်
ကျောက်ဆိုင်တောင်ကြီး
လီဟုန်စီး
ထီးမားတည်ရပ်
ဟားတိုက်ရယ်ကတ်တေ --။

ပင်လယ်တိမ်တင်းခွန်
လီချွန်သံတိုးတိုး
လှုပ်ခတ်နှိုးခါမှ
ဘ၀အထောင်းအထု
အဖုအထစ်တိက
အစစ်အမှန်တရားကို
မိကျန်လိုက်ပျာယ်လား
ကဗျာဆရာ
စဉ်းစားယင်း စဉ်းစားယင်း --။
..................

နွယ် (စစ်တွေ)

(မှတ်ချက်။ ။ မြန်မာပိုင်ရွီးထားခြင်းကို ရခိုင်ပိုင်ပြန်ရွီးထားခြင်းဖြစ်ပါသည်။)

မိုးသထအာရုဏ်

ညဉ့်သန်းခေါင်လေ၊ အမှောင်လွန်မြောက်
အာရုဏ်ရောက်လို့၊ ခတက်ခေါက်ကေ
စိတ်ရောက်ရည်မှန်း၊ သဒ္ဓါဆွမ်းကို
လှူဒါန်းဖို့လေ၊ ချက်လတ်တေ --။

ဂြိုးငှက်လူပျို၊ တေးခြင်းဆိုလို့
စိမ်းညိုရွက်နု၊ နှင်းထုဝီ၀ီ
လီချေသွတ်သွတ်၊ တိုက်ကာခတ်ကေ
ရင်ဖတ်အီးရေ၊ ချမ်းလတ်တေ --။

အာရုဏ်ပျိုးလို့၊ မိုးသထမှာ
နိုးထအားမာန်၊ ဗြိန်းစောင်းသံလေ
တောင်ယံကိုဟပ်၊ ဂလိုင်ထပ်ပျာယ်
ရိုက်ခတ်မြည်ဟိန်း၊ စည်တော်ကြိမ်းကေ
ကြက်သိမ်းထရေ၊ အားရရေ --။

ရောင်နီသန်းကေ၊ ဆွမ်းပန်းရီချမ်း
လှုဒါန်းမျှဝီ၊ မိတ္တာမြီမှာ
ပီတိနှိုးဆော်၊ သာထုခေါ်မိ
မှန်းမျှော်နိဗ္ဗာန်၊ သံစည်သံလည်း
မာန်စွယ်နှိမ့်ချ၊ ငြိမ်းချမ်းစွ --။

.....................
မောင်နန်းလှ (မြောက်ဦး)

ဇာတ်ဝင်ခန်း

ကျားက လူကိုနိုင်
လူက ဓါးကိုနိုင်
ဓါးက ကျားကိုနိုင်
သုံးပွင့်ဆိုင်ဇာတ်လမ်း
ဇာတ်ဝင်ခန်းမှာ
ဇာအခန်းက ပါပါ
လောကဇာတ်စင်ထက်မှာ
အကွက်တူကေ
ညံ့လူခံလိုက် --။

................
(စစ်တွေညိုသန့်)

ကြက်ခြီ (နန့်) ခွန်း

အမှားကြက်ခြီ
အမှန်ခွန်းချိတ်
နိမိတ်လက္ခဏာ
ဆရာရို့က
ဖော်ညွှန်းပြ၏ --။

ကြက်ခြီနန့် ခွန်းချိန်
နိမိတ်သင်္ဂေတ
အမှတ်ပြရန် ---။

ကမ္ဘာ့သမိုင်း
အခန်းတိုင်းမှာ
အရိုင်းနန့်အယဉ်
အယဉ်နန့်အရိုင်း
နှိုင်းယှဉ်တင်ပြ
မုသ၀ါဒ
ဘက်မကျဖို့ --။

မျဉ်းချဆွဲတန်း
သစ္စာလမ်းကို
မျှော်မှန်းကြသော်
တွေးခေါ်ဖြန့်ကား
အမှားဆုံးပြီးအမှန်
အမှန်ဆုံးသော အမှား
ခွဲခြားကြည်လင်
မြင်ပါဖို့ --။

..........
(သျှင်အုန်း)

သမိုင်း (နှင့်) လူ

(တစ်)
လောကမှာ
ကဗျာရွီးဖို့
အမင် မွီးပီးခရေ ငါ --။

(နှစ်)
ယုံကြည်ချက်
ခံယူချက်တွက်
အသက်သီဖို့ မကြောက်တေ ငါ --။

(သုံး)
ကာလသန်းခေါင်
အမှောင်ထုအောက်
ထိုးဖောက်ရုန်းကန်
ရှင်သန်ထမြောက်
ပန်းတိုင်ရောက်အောင်လားဖို့ ငါ --။

(လေး)
ကဗျာတပုဒ်
စာတအုပ်
ကိုင်ဆုပ်ဖက်လျှက် သွီးအသက်လေ
ချေဂွေဗားရား ဖူးချစ်အားပ
တရားတဖက် ဓါးတလက်နန့်
နက်ဖန်များစွာ မဟာအနာဂါတ်
မြင့်မြတ်သည့်လမ်း ခရီးကြမ်းကို
ဖြတ်သန်းဝံ့ရဲ လျှောက်မြဲငါ --။

...............

(မင်းပြားမောင်ယုနွယ်)
ရခိုင်မဂ္ဂဇိန်းအမှတ် (၂၅) စာမျှက်နှာ (၂၀)
(မှတ်ချက်။ ။မူရင်းမြန်မာပိုင်ရွီးထားခြင်းကို ရခိုင်လိုပြန်ထားသည်။)

သဇင်ပွင့်စီ၊ ပြည်သာစီ

ငွီနှင်းဝီ၀ီ
မှိုင်းပြာရီလွမ်း၊ ပြည်ရခိုင်လေ
ဆောင်းညချမ်းမှာ၊ သဇင်ပန်းခိုင်
ကြိုင်ကြိုင်မွှီးဗျာယ်၊ ရှုယောင်မငြီး
အလှဆင်ကေ၊ ရွှီပြည်ကြီးကို
သာယာအီးဖို့၊ သာစီဖို့...။

သဇင်ပန်းမျိုး၊ စပျိုးသန္ဓေ
အမြစ်တွယ်ပြု၊ သဇင်ဥကို
သစ်စုရှာဖွီ၊ ရောင်းစားနီလို့
ဝိုညောင်လဲတုံး၊ သဇင်ပြုန်းရ
မျိုးဆုံးရကေ....
သာစွရခိုင် ပြည်မဏ္ဍိုင်မှာ
နောင်လာဆောင်းည၊ နှင်းမှုန်ရွထဲ
ကြိုင်စွသဇင်၊ ပန်းဘုရင်ကို
မြင်ချင်ဇော်နန့်၊ ရွှေရင်မောရလိမ့်တကား...။


(မှတ်ချက်။ ။ ရွီးသူနာမည်ကိုမိလားခပါယာ။)

လခြမ်းသဇင်

၁။ သဇင်...
မြင့်မြတ်နိန်ရာ၊ ပင်ယံမှာလန်း
နှင်းရည်ဖြန်းလူး၊ မျိုးဂုဏ်ထူးနှင့်
ဆောင်ကူးရာသီ၊ ခါတော်မီပန်း...။

၂။ ပန်းမွိ့ရာမှန်၊ ကေသာစံနန်း
လခြမ်းသဇင်၊ ဂုဏ်တင်ထိပ်ထား
ပန်းများတော်ဝင် တုနှိုင်းပင်မဲ့...။

၃။ မွှီးပျံ(ပြန့်)သင်းကြိုင်၊ ရနံ့လှိုင်ဖက်
ငွေလွှာယှက်ဖြာ၊ မျိုးမြတ်ဇာတိ
စောင့်သိသီလ၊ ခိုင်မြဲဂတ်လို့...။

၎။ သဇင်နှမ၊ ဆန်းစလထွက်
နိန့်ရက်ဆက်ပျိုး၊ အားသစ်တိုး၍
မညိုးဂုဏ်ရောင်၊ ထွန်းတောက်ပြောင်စီ...။

၅။ မယွန်း ဖောက်ပြန်၊ မူမှန်မျိုးရိုး
သွီးထိုးမနှော၊ မြတ်နိုးစောနှင့်
မှန်သောနိန်ရာ၊ ပွင့်လန်းပါလေ
မွှီးသင်းစီ...။

.....................
မြတ်ရွှေ[မြေစာရင်]

(မှတ်ချက်။ ။ မူရင်းမြန်မာပိုင်ရွီးထားရေ ကဗျာကို ရခိုင်လိုပြန်လိုက်ပါသည်။)

ရွက်ကြွီချေ

ဟောင်နွမ်းရွက်ကြွီ
ရွက်ဝါချေရို့
ကြွီကာကျဆင်း
မြေကြီထက်ဝယ်---။


ဖူးငုံ၊ဖူးစုံ
ရွက်သစ်တိဝီဖို့အတွက်
သစ်အို ရွက်တိက
နိန်ရာလဲပီးရရေ---။

ငါရို့ကလည်း
နောင်မျိုးဆက်သစ်ရို့
ရီကြိုင်မြက်နုဖို့အတွက်
ငါရို့ဘ၀တိကို စတေးပြီးကေ
အဖပြည်အတွက်
ကျေးဇူဆပ်ရဖို့သိမ့်---။

................
မင်းခရာ MU

ခြင်ထောင်ထဲက ပစိကိုက်ပြသူများ

“အီကရီး” မတွန်
“အောက်အီးအီး” ရာ
နားညီးအောင်
အတောင်ချေကို ဘုန်းဘုန်းသတ်
တွန်တတ်တေ ကြက်ဖ
တောင်းထဲက --။
...............
(သာလှဦး)

ဖက်ခွက်များသို့

မယုံပါဗျာ
------------
အချစ်ထန်ပြင်းကေ
နောက်မီးမလင်းကဲ့ --။

မောင်းမောင်က အကျွန့်ဘ၀
ယင်းပိုင်ဆို မလွရ --။

မောင်းမောင်က အကျွန့်အချစ်အိုး
ယင်းပိုင်ဆို ခိုးမစားသင့် --။

မောင်းမောင်မဟိကေ အယင်သီမည်
ယင်းပိုင်ဆို ကတိတည်လေ --။

မောင်းမောင်နန့် မခွဲနိုင်
ယင်းပိုင်ဆို ကျမ်းကိုင် --။

ဖောက်ပြား မှောက်မှားနီကေ
ပေါက်ကြားလားဖို့နန်းရာ ဘုချေ --။

ဖက်ခွက်
ပက်စက်တေ --။

(ခတ်ကျောက်သီး)

Stone

ပန်းတိုင်ရောက်ရာ

ဘဝပန်းတိုင်
လှမ်းဆုပ်ကိုင်ဖို့
အားမာန်ကိုတင်း
ဇွဲကိုရင်းပနာ
ကြိုးစားပါဂေ
မရဇာမှာ
ဟိအံ့နည်း...။
............

Ven.Eindobhasa

၂၆-၅-၂၀၀၉

၁၈:၁၅ pm

ငိုခြင်းစီလို့ငိုလိုက်ချင်

အဘာလေ အဘာ ... !
အဘာဟိခါက
အဘာသားသမီးတိ
ရွာအလယ်မာ
မျက်နှာပွင့်ခစွာတိ
ဒေဂုခါမာ
ခွက်ကိုင်ဗျာယ်
ရွာစိုင်လျှောက်မတောင်းရကေလေ့
အရပ်ရှစ်မျက်နှာ မာ
ကျွန်ခံနီဂတ်ရဗျာယ်ထော
အဘာ... !

အဘာလေ အဘာ ... !
အဘာဟိခါက
အဘာရို့အိမ်မာ
ဧယိုင်သာခြင်းသံညံလို့
စာပီလင်္ကာ
ထထိန့်ကြိုးခကေလေ့
ဒေဂုခါမာ
အဘာသားသမီးတချို့
ကိုယ့်စကားကိုမပြောချင်
ကိုယ်စာကိုဒေါင်ရွီးဖို့ရှက်နီဂတ်ဗျာယ်
အဘာ ... !

အဘာလေ အဘာ ... !
အဘာဟိခါက
အဘာသားသမီးတိ
အမျိုးစောင့်ထိန်းရေလို့
ရာဇ၀င်မာ ထင်ပေါ်ခကေလေ့
ဒေဂုခါမာ
ရစွာယူလို့
ဘဘောင်းဆုံးနီဂတ်ဗျာယ်
အဘာ ... !

အဘာလေ အဘာ ... !
အဘာဖိုးဖီးရို့
ဆယ်သက်စားမကုန်
ထားခကတ်ကေလေ့
ရွာလယ်မာပြောစရာဖြစ်လားစွာစကားက
မ မ နန့် ဗျ ရာကျန်ဗျာယ်လတ်
အဘာလေးးး .... !
အဘာတချက်လာကြည့်ဖိ ... !

..........

ကိုမင်း

Monday, May 25, 2009

ဘဝမိလားရေ သူငယ်ချင်းသို့

သူငယ်ချင်း…
မိုးဦးကိုရောက် ဝဿန်ရောက်ကေ
ငါ့ရို့ဘဝ မိန့်မရာစရာ
အချေခါကို ငါ့မျက်စိမှာ
ပြန်မြင်လာရေ…။

သူငယ်ချင်း…
ထို...ငယ်စဉ်က
မင်းနန့်ငါနန့် လက်ချင်းယှက်လို့
ကိုယ့်မွီးရပ်ရွာ ယင်းတောရွာမှာ
ဖနပ်မပါ ထီဗလာနန့်
သလူနန့်မိုး မက်ကလာဆိုးကို
အားရဝမ်းသာ ဂေါင်းမှာဆောင်းကာ
မိုးရီထဲမှာ ပျောရွှင်စွာနန့်
ကျောင်းတက်လားခ အချေဘဝကို
အမြဲတမ်းငါက သတိရရေ…။

သူငယ်ချင်း…
မင်းဘဝက ကံကောင်းလှလို့
အထက်တန်းနန့် တက္ကသိုလ်ပညာ
အဖြာဖြာကို ဆက်လက်ဆည်းပူး
ပညာမျိုးစုံ လွန်ပြည့်စုံရေ
ဘွဲ့ဒီဂရီ အလီလီကို
ပိုင်ဆိုင်လီစွ မင်းဘဝက
တင့်တယ်ထည်ဝါ ရနံ့ဖြာရေ
မင်းကအာစရိယာ ကျောင်းဆရာ…။

သူငယ်ချင်း…
ဆင်းရဲပြာကျ ငါ့ဘဝက
ကျောင်းစာကိုလည်း ဆက်မသင်နိုင်
တလုတ်ဝမ်းစာ စားစရာကို
နပ်မှန်ဖို့အရီး လုံးပန်းထွီးပနာ
ရှာယင်းဖွီယင်း ရုန်းကန်ယင်းနန့်
ပင်ပန်းကြီးစွ ငါ့ဘဝပါ…။

သူငယ်ချင်း
မင်းသိရေအတိုင်း
ပြည်အတွက် အသက်သွီးကြော
လယ်သမားပီပီ မိုးဦးချိန်ထောက်
ဝဿန်ရောက်က အပ်ကိုင်းကိုကိုင်
ထွန်တုံးကိုင်နန့် ယင်းကမတက်
လယ်ထွန်လျက်ပါ…။

သူငယ်ချင်း…
မင်းမွီးခရာ ကိုယ့်ရပ်ရွာအတွက်
မင်းတတ်ထားရေ ပညာချေနန့်
သိညာဏ်ခေါင်းပါး မင်း/ငါ့ရို့ရွာသားကို
သွန်သင်ဆုံးမ လမ်းညွန်ပြပနာ
အမိမြီ(အဖမြီ)ကျေးဇူး ဆပ်သင့်ရေ…။

……………..

Ven.Eindobhasa

၂၆-၅-၂၀၀၉

၈:၃၃ am

အလွမ်းညည့်

ချစ်သူနန့်ဝီးနိန်ရေညည့်
ငါ့ရင်မှာ
အလွမ်းဒဏ်ရာတိနန့်
အိပ်လို့ရဖို့ဆိုစွာဝီးလို့…။

ငါက
မင်းကြောင်းကို
တညည့်လုံးထိုင်တွေးပြီး
သွီးပျက်မတတ်
အရူးတယောက်ပိုင်…။

မင်းကိုမတွိ့ရရေနောက်
သာယာလှပရေညည့်တိမှာ
အသံတိတိတ်ဆိတ်
ပျော်ရွှင်စရာတိဆိတ်သုဉ်းပြီး
လူသူကင်းရေ တစပြင်ပိုင်…။

မင်းမဟိရေနောက်
ငါ့၏
တယောက်တည်းညည့်မှာ
မိုးကောင်းကင်ကြီးကိုကြည့်လိုက်တေခါ
လမင်းကြီးက ငါ့ကို ပျက်ရယ်ပြု
ကြယ်ချေတိကကလည်း
ငါ့ကို ဟားတိုက်နီကတ်ပြန်ဗျာယ်…။

-------------
Mg Tha Hla

25-5-2009

7:40 am

အချစ်ဆုံးသူသို့်

ရိုးရိုးချေဝန်ခံရကေ
ထို...အယင်တုန်းက
ငါစွာ
အချစ်ဆိုစွာဇာလဲလို့
ငါမစဉ်းစာမိခ...။

ချစ်ခြင်းအစ ရင်ခုန်ခြင်းက
ဆိုရိုးစကား ဟိနီငြားလည်း
ငါ့ကိုရင်ခုန်စီရေသူဆိုစွာ
မင်းကလွဲလို့
ငါ့ဘဝတလျောက်လုံးမှာ
မဟိခပါ...။

အိပ်စက်နီရေ
ငါ့ နှလုံးသားကို
မင်းကလှုပ်ကိုင်နှိုးလိုက်လို့
ကျောက်ဆစ်ထက်မာရေ
ငါ့ နှလုံးတိ
အရည်တိပျော်လို့
မင်း၏
မေတ္တာစမ်းရီအိုင်ထဲကိုစီးဝင်...။

ယေကေလေ့..
အခုချိန်မှာတော့ခါ
ငါပိုင်ဆိုင်လိုက်ရရေ
အချစ်ဆိုစွာက
ပူလောင်ခြင်းတိနန့်ပြည့်လျှံနီရေ
နွီကန္တာရပိုင်
ငါ့ရင်ကိုလောင်မြိုက်နီလီရေ...။

မင်းသင်ပေးလိုက်ရေ
အချစ်ဆိုစွာက
ငါ့ဘဝအတွက်တော့ခါ
အလွမ်းတိ၊၊ အဆွေးတိ၊မျက်ရည်တိနန့်
ပြည့်နီရေ
အလွမ်းညည့်တိရာလား....။

မင်းပီးခရေ
အမှတ်တရတိကို
ရင်မှာ တပုံတပင်ပွေ့ပိုက်ယင်း
မင်းကိုမှ ရူးမိုက်စွာနန့်
ထာဝရချစ်နီ၊ မျှော်နီရေ
ငါ့ ဘဝစွာလည်း
အလွမ်းဒဏ်တိသင့်လို့
မလှပပါဗျာယ်....။

ငါ့ကို
မင်းပီးခရေ အကြင်နာတိ
မင်းပြောခရေ အချစ်စကားတိ
အကြံအဖန်ရာဖြစ်ဖြစ်
မင်းက ငါ့၏
အချစ်ဦးနန့် အချစ်ဆုံးသူဖြစ်လို့
တဖန်ပြန်လို့
မသုံးသပ်ချသ်ပါဗျာယ်....။


ငါစွာ
မင်းဘဝအတွက်
အချစ်ဦးသူမဟုတ်ကေလေ့
အချစ်ဆုံးသူတယောက်ဆိုစွာ
မင်းယုံပါ...။

ပြီးကေ..
ငါစွာ
မင်းဘဝအတွက်
အချစ်ဦးသူ မဟုတ်ကလေ့
ငါဘဝအတွက်တော့ခါ
အချစ်ဦးသူနန့် အသက်ထက်ဆုံး
ချစ်သူဆိုစွာ
မင်းးနားလည်ပါ...။

..............

Mg Tha Hla

၂၄-၅-၂၀၀၉

၎:၄၄ am>၆:၁၁ am

အမဲလိုက်ခွီး(သို့)ရခိုင်သား

စိမ်းညိုမည်းမိုင် တောဂနိုင်မှာ
ဂဂိုင်လှမ်းအော် တောလုံးကျော်အောင်
သံပျော်သကုန် တောလုံးတုန်...။

အားဟိသားကောင်း သူမသျှောင်ဘဲ
တန်းတောင်လည်းပွမ်း ခြီလည်းနွမ်း
ပင်ပန်းရင်တုန် နှလုံးခုန်...။

အမဲလည်းရ အိမ်ပြန်ခလို့
သူ့ကိုတော်ရေ သားဖမ်းရေလတ်
လိုင်ချေကိုပွတ် ဂုတ်ကိုဖက်ဗျာလ်
နှုတ်ထွက်အလို မြှောက်ပင့်ဆို...။

အမဲသင်ခါ ယင်းနားမှာပင်
ရိုက်ကာရိုက်စောင်း အောင်းအောင်းခေါ်ဖို့
သားတောင်းဟန်ပန် သူလုပ်ပြန်....။

သင်လို့လည်းပြီး ထခါနီးမှာ
ပီးပစ်ခစွာ စိတ်မှာအထင်
အသားမြင်ကါ ဗြီးထလာလို့
စားဖို့ပျင်ခါ အရိုးပါ...။

စိတ်ပျက်လက်ပျက် စိတ်မှာတွက်စွာ
လက်ကလည်းပွမ်း ခြီလည်းနွမ်းအောင်
တောတန်းကိုကျော် သံကုန်အော်ခစွာ
မျော်ရအကျိုး အရိုးရာတွိ့ကာ
အမဲလိုက်ခွီးဘဝ...။


သြော်....
ငါ့ရို့ရခိုင်သားတိလည်း
ကိုယ်ပိုင်ဆိုင်ရေ
သယံဇာတတိကို ကိုယ်မစားရ
မော်ယင်းယင်းနန့်မျော်ဗျာလ်
သူများပစ်ချခရေ အရိုးတိကို
ကိုက်နီရဗျာလ်မလားယေ...။

ဇာထူးလဲအမဲလိုက်ခွီးနန့်
...... တတူတူဗျာလ်
အမဲလိုက်ခွီး(သို့) ရခိုင်းသား...။

Ashon(အသျှင်)

(ကိုပြည်ကထွက်စွာတိကို အားလုံးကိုယူပနာ အမြင်ကောင်အောင်လမ်းဆိုး..တာဆိုးလုပ်ပီးစွာနန့် ကြေနပ်နီရရေ ရခိုင်းသားရို့ဘဝကိုခံစားဖွဲ့ဆိုလိုက်သည်..။)

Sunday, May 24, 2009

ယောက်ဖကိုကြက်ဥ တိုက်တေလူတိအတွက်

တွင်းမှားဝင်မိရေ
ကြွက်တစ်ကောင်နန့်တူရေမင်းကို
ငါစကားတစ်ခွန်းလောက်
ပြောချင်မိရေ...။

မင်းSign Inလုပ်ခါ
Burmese Meeting Point ထင်လို့များ
မမြင်မကန်းနန့်
မှားဝင်မိစွာလာလို့...။

ကြွက်ထဲမှာလေ့
ကြွက်စုပ်ဆိုစွာမှ
မျက်စိမှုန်ရေ ကြွက်မျိုးလို့
ငါကြားဖူးရေဝေ...။

မင်းအနိန်နန့်
နောက်တစ်ခါ တွင်းမှားမ၀င်ဖို့
ငါရို့၏မျက်စိတိကို
အဆိပ်သင့်နိန်ရေဗမာစာသားတိနန့်
အဆိပ်မခတ်ဖို့...။

မင်းအနိန်နန့်
နောက်တစ်ခါ အိမ်မှားမ၀င်ဖို့.
ငါရို့၏နှလုံးအိမ်ကို
သွီးဆိုးသွီးပုတ်တိနန့်
မညစ်ပတ်စီဖို့...။

မင်းအနီနန့်
ပုပ်ဟောင်နိန်ရေ ဗမာတိ၏
ပေါ့ပျက်ပျက်စကားလုံးတိကို
ငါရို့၏မိသားစုအသိုက်အမြုံ
နွီးထွီးရေကမ္ဘာထဲကို
ဆောင်ယူမလာဖို့...။

မင်းအနိန်နန့်
လောက်ကျနိန်ရေ ဗမာငပိရည်တစ်ခွက်ကို
မကိုင်ဆောင်လာဖို့
ငါရို့၏မျိုးဆက်သစ်တိ
ရှင်သန်ရေနိန်ရာကို
ငပိရည် နံ့နန့်မပုတ်ဟောင်စီဖို့...။

မင်းအနိန်နန့်
မျိုးမစစ်တေ လက္ခဏာတိကို
ထုတ်ဗျာလ်မပြဖို့
ငါရို့၏ရွီရောင်မျိုးဆက်သျှေတိကို
ကျွန်ဇာတ်တစ်ခါထပ်မသွင်းဖို့...။

မင်းအနိန်နန့်
မင်းယောက်ဖက
ိုနောက်တစ်ခါကြက်ဥမတိုက်ဖို့
ငါရို့ဘိုးဘီးတိ၏ အစိုင်အလာမြင့်မားရေ
စာပီကိုမစော်ကားဖို့...။

မင်းအနိန်နန့်
နောက်တစ်ခါ
ရက္ခိတရို့အလင်းအိမ်ထဲ
မမြင်မစမ်းနန့်
တွင်းမှားဝင်မလာဖို့
ငါတောင်းပန်ချင်ရေဝေ
ကြွက်ချေ....။


DO_OR_DIE

Saturday, May 23, 2009

သွီးခင်းလမ်းက သွီးစက်တိ

ဆောင်းလရာသီ ညဉ့်ကိုလွန်ခ
အာရုံမိုးထက် အလင်းရောက်လေ့
နီရောင်မရောက် တိုးမပေါက်ပဲ
အရိုးကွဲအက် သွီးခဲမတတ်
မညှာမတာ လီရိုင်းကြောင့်....။

ဖရက္ခိုင်ပြည် အနာဂတ်လေ့
ဆောင်းလပြာသို မိုးသောက်ချိန်သို့
နှင်းတ၀ီဝီ မှုန်ဗျာလ်မှိုင်းလို့
ရှိ(ရှေ့)ကိုမှန်းဆ ကြည့်ပါကေလေ့
လက်တစ်ကမ်းထက် မမြင်ရ...။

မိုးလ၀ါခေါင် မှောင်ဗျာလ်မဲ(မည်း)လို့
အာကာတစ်ခွင် ငိုသံပီးလို့
မိုးကြိုးသံလေ့ တဒိန်းဒိန်းနှင့်
မိုးထဲရီထဲ ချမ်းခိုက်တုန်သည်
မညှာမတာ မိုးမင်းကြောင့်...။

နွံတောထဲက တိုးထွက်မရ
ကျုပ်တလူးလူး ပြည်နာဂတ်လေ့
ကယ်သူကင်းမဲ့ ဆယ်သူလေ့ဝီး
ရင်နှစ်သားလေ့ ရှောင်ခွာပြီးလို့
ဆက်လို့နစ်မြဲ ကျန်ရစ်၏...။

သို့ပါသော်လေ့
ပြည်ရက္ခိုင်သား မောင်ဘွားရို့မှာ
ကိုယ်ကျိုးစီးပွား တစ်ခုတည်းတွက်
ဂေါင်းထဲထည့်လျှက် မင်းလေ့ရွီးလျှောက်
ဘေးကင်းလမ်းကို ငါလေ့လျှောက်ဖို့
ပန်းခင်းလမ်းဆို
ငတ်ပြတ်တစ်ခါ ၀မ်းဝရုံနှင့်
လမိုက်ညဥ့်တိ အံကြိတ်ဖြတ်ယင်း
စူးတောထဲက ဒုက္ခ၀ဲနှင့်
ကျည်ဆန်တောက သွီးခင်းလမ်းကို
ဇာသူဝင်လို့ နွဲပါ့မည်...။


DO_OR_DIE


မှတ်ချက်။ တော်လှန်ရီးလုပ်စားနီရေလူတိကို မဆိုလို.. ပြည်ချစ်စိတ်နန့် ကိုယ့်အသက်ကိုလှူပနာ ..ကိုယ်ကျိုးစွန့်နီကတ်တေ... မြင့်မြတ်ဇာနည်တိကိုဆိုလိုပါရေ...။

မှတ်ဗျာယ်လာ

ဝင်းဝင်းပပ လပြည့်ဝန်းသို့
ချစ်နှမပျို စက်စက်ယိုကို
စမြင်တည်းက ချစ်စိတ်ယိုဖိတ်
ပြူးထွက်မတတ်... ကိုယ့်နှစ်လုံးနှင့်
အားရဘားရငမ်းမိသည်...။

အိမ်ရောက်သည်နှင့် အခန်းထဲဝင်
တန်းခါးပိတ်၍ သုံးရက်တိုင်တိုင်
ထမင်းမစား.. ချူပေါက်မအားဘဲ
ချစ်နှမအား... ဆက်မည်စာကို
ကြိုးစားပမ်းစား ရွီးဖွဲ့သည်...။

ထိုသို့ရွီးဖွဲ့... ချစ်စာခွီကို
နှမလက်သို့.. ဆက်ဖို့ကြံလျှင်
မင်းထီးဘုရင် သတ္တိပြောင်သို့
လက်ရုံးနှလုံး.. ပြည့်ဝမှန်လို့
ကြောက်ဒူးတုန်၍..လန့်ထိတ်သည်...။

သို့ပါသော်လည်း
မဆက်ပြန်က မဖြစ်တဖန်
ဟိပြန်သောကြောင့်
ချစ်သူငယ်ချင်း.. ကျော်သန်းစိန်အား
သွားဖြဲကာပြ အောက်ကျို့ကာနှင့်
ကူညီဖို့အကြောင်း တောင်းပန်၏...။

ချစ်သူငယ်ချင်း ကိုယ်တော်ချောက
“မစိုးရိမ်ကဲ့ စိတ်ရာချဝေ
မင်းနှမကို မင်းဘက်ပါအောင်
မင်းစာခွီကို ဆောင်ဗျာလ်ယူလို့
ငါအမှန်ပင် ပီးအပ်မည်...။”

တပတ်ကြာညောင်း ကျော်သန်းစိန်အား
လမ်းမှာတွိသော် ချစ်နှမက
ဇာသို့ဆိုကြောင်း သိချင်ဇောနန့်
အငမ်းမရ ပင်ထက်မျောက်သို့
မိန်းပြန်သောခါ ကြားရသည်ကား..

“စာခွီကိုလေ့ ပို့ပြီးကြောင်းနှင့်
စာလင်္ကာစီ ကျွန့်လက်ရာလေ့
နှမပျိုဖြူ... သဲအူတုန်လို့.
ဘ၀င်ချိုမြ.. ကြိုက်နှစ်သက်၍
စိတ်မပူဖို့ ဆိုလာ၏...။”

သို့ပါသော်လည်း
ချစ်နှမပျို ပပ၀င်းက
ကိုယ်တော်ချောမောင်
ကျော်သန်းစိန်အား စာစီကုံးသူ
“ကိုနှခေါင်း”ဟု မှတ်ထင်သောကြောင့်
ရှက်ပြုံးဝင့်ကာ.. ဂေါင်းညှိတ်ကာနှင့်
“သူ့အားချစ်ဖြေ ပီးလိုက်သည်”ဟုဆိုလာ၏ ..။

မင်းထီးဘုရင် ဘုန်းရောင်ပြောင်သို့
သတ္တိအရောင် ထွန်းပြောင်သောသူ
အကျွန်ုပ်ကား
“သူများအားကိုး ပေါက်ဆိန်ရိုး”သို့
ကိုယ့်အားကိုယ်ကိုး မစွမ်းဆောင်ဘဲ
ယောက်ဖအားကိုး မိလီသောကြောင့်
အသဲဗြဗြန်း... ကွဲရပါ၏...
တရားနှင့်ရာ ဖြေပါမည်...။

DO_OR_DIE

ဇာတ်လမ်းကိုအဆုံးသတ်ခြင်း

သဘာပတိများကြွလာကေ
ရပ်စောက်ရပ်အလေးပြုရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

သက်တန်းကုန် ၀န်ကြီးတိနန့်တွိတိုင်း
ခါးကိုင်းဦးညွတ် အရိုအသေပီးရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

ပြက္ခဒိန်မှာ ဆီးမှင်အနီကွက်ကျား
ရက်တိကများများ
ညိတိုင်းညိတိုင်း ဆန္ဒပြရဖို့လား
အခမ်းအနား အခမ်းအနား နိမအားညမအား
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

အစည်းအဝေးတက်တိုင်း
ငွေရေကြေးရေးအယှုတ်ယှင်းရ
ညီညွတ်ရေး ညီညွတ်ရေးဆိုဗျာ
နဖူးကွဲဒူးပြဲ အလဲထိုးရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

အချိန်တန်ကေ အချိန်မှန်ထုတ်ပြန်ရေ
လံကြုတ်သတင်းတိကို
ရေဒီယိုဖွင့်တိုင်းကြားနာရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

ရခိုင်တခွန်းမပါ
ရခိုင်အမျိုးသားမြန်မာသတင်းစာကို
လစဉ်ပုံမှန် စာမျက်နှာလှန်လှန်ဗျာဖတ်ရ
ကျွန်တော့်မှာ တော်လှန်းရေးအတွက်
ပင်ပန်းလားခပါဗျာ --။

မမြင်ချင် မကြည့်ချင်အဆုံး
မျက်နှာတိကို
မြင်ရပြုံးပြရ ဘ၀ဒုက္ခများစွာနန့်
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

ရန်သူကို တော်လှန်ဖို့အချိန်မရ
ရွှေလဒများကိုကျည်း တိုက်ခိုက်နီရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

(သာလှဦး)

Wednesday, May 20, 2009

သွီးကြွီးဆပ်ရဖို့သိမ့်

ရှိခိုက်အဆက်ဆက်ကပင် ကိုယ့်ထီးကိုယ့်နန်း
ကိုယ့်ဘုရင်နန့်.... ကိုယ့်သမိုင်းနန့်
Independent Arakan Kingdom လို့
ကမ္ဘာပေါ်မှာ ထင်ပေါ်ခရေ ငါရို့ရက္ခိုင်....။

ဘုရားသျှင်ကိုယ်တော်တိုင် ကြွရောက်ခရေ
ဗျာဒိတ်ဝင်မြီ... ဂုဏ်သတင်းကျော်ဇော..
ရက္ခိုင်လူမျိုးပါလို့.. ဂုဏ်ယူခကတ်တေ..
အစိုင်အလာမြင့်မားရေ... ငါရို့ရက္ခိုင်...။

ခွီးသားမောင်ဝိုင်း!!
အောက်သားငပိ..
စစ်မကြောငြာ အသံမပြု
ခွီးကြံကြံလို့
ထီးကျိုးစည်းပေါက်
ရင်နာခရရေ... ဖရက္ခိုင်ပြည်...။

လူကြီးလူလတ်
အစိတ်ကေမကျန်
ဓါးမိုးလှံထောက်
မျိုးပြုတ်လားအောင်
အသတ်ခံခရရေ
နှစ်လေးဆယ်ငရဲခန်းကို
မိန့်ဂွန်ဆောင်နီကတ်လို့ ဖြစ်ဖို့လား...။

လူမှန်းမသိ
လ,သားရွယ်မှာ
လောကအကြောင်းဇာမသိဘဲ
အသတ်ခံရ မြီကျခရေ
ရက္ခိုင်သွီးတွက်
မြောက်ဦးထီးနန်း
ဗမာသွီးနန့်ဆီးပစ်မေ...။

DO_OR_DIE


December 31, 2006 ... 11:00 PM

Tuesday, May 19, 2009

“ရာစုအ၀င် တေးခြင်း”

ပြဿနာပြတင်းပေါက်က
ပြင်ပ၀န်းကျင်ကို လှမ်းပနာကြည့်ကေ
မြင်လာရရေ မြင်ကွင်းတိအားလုံးစွာ
ပြဿနာတိနန့်ရာ ပြည့်လို့ နိန်လီဖို့ယေ...။


အပြစ်တင်တတ်တေဟင်းခင်းထဲမှာ
ရင့်မှည့်နိန်ရေ ပဋိပက္ခတိ
ရာစုအသိနန့် ဆွတ်ခီ
နီဝင်ညဇာတိနန့် 
ချန်ထားခကတ်မေ….။
.................

ခိုင်အောင်အောင်
၁၈၊၀၅၊၂၀၀၉

Monday, May 18, 2009

လာဖိုိ့နိန်တရက်

ကြပ်ခိုးအထပ်ထပ် တန်းဗျင်းဒေါင့်က
စဖိုနားမာ ဆောင့်ခြောင်ချေထိုင်
ပြောင်းဂျီ(ဂျိုင်/ကျိုင်)တလုံးကိုင်လို့
ထမင်းတလုံးချက်ရဖို့
မီးခိုးအလုံးလုံးကြားမာ
မျက်စိတိတ်တက်နန့်
လိပ်ဂေါင်းထွက်ပါအောင်
မီးမှုတ်နီရရေ
အိုအမိ...။

အိမ်ဦးခန်းဘုရားစင်ထက်မာ
မီးပူဇော်ပိုင်ယှောင်
အခန်းလင်းအောင်ထွန်းထားရေ
မှိုင်းအူနီရေ မီးခွက်အလင်းချေနန့်
အားပြုပနာတရားစာဖတ်နီရေ
အိုအမိ...။

ချမ်းချင်ချမ်း မချမ်းချင်မချမ်း
ရခိုင်ဆောင်းတွင်းမာ
ပဆိုးကိုဂေါင်းကခြုံ
ခွီးချေတရွီဘေးမာထား
အညာရီထင်းတုံးနန့်
မောင်းဂါအောက်ချေမာ
မီးလှုံနီရေ
အိုအမိ...။

သူများတကာသားသမီးတိ
“ဂတ်စ်မီးဖို”နန့် အသားကိုကင်
လျှပ်စစ်ဆိုစွာရီပိုင်သုံးလို့
“ကာဗွန်ဒိုင်အောက်ဆိုဒ်”အကြောင်း
အာဘောင်အာရင်းနန့်
ပြောနီဂတ်ချိန်
အမိခမျာ
“ဂတ်စ်” ဖြည့်သည်ဆိုင်းဘုတ်ကိုမြင်
မီးဆွဲထွန်းဖို့လောက်ရာသိထား
Heater ဆိုစွာ ဖြူလား၊ မဲလား
စိုင်းစားရာမာတောင် ပါလီဖို့မဟုတ်...။

အော်....
မမြဲခြင်း သင်္ခါရ နိယာမထဲက
ပြောင်းလဲလာဖို့တနိန့်ကို
အမိတချက် မြင်တွိ့ရလီအောင်
နီကောင်းအောင်ရာ နီပါလီ အမိ...။
....................

ကိုမင်း

၁၈-၅-၂၀၀၉

Saturday, May 16, 2009

အို....ရက္ခိတရို့

ဘ၀င်မသန့် 
မပျင်ဝံ့လို့ 
သဇင်ရနံ့  မရှူထိုက်တေလူတိ ….။

အမျိုးစပျောက်
ပိုးကျဖောက်လို့ 
ရိုးမအောက်ကို မပြန်ဝံ့ရေလူတိ ….။

ရင်ဝယ်အမှား
ခင်တွယ်ထားလို့ 
ပင်လယ်နားကို မလာဝံ့ရေလူတိ ….။

အမျိုးသီလ နှစ်ဌာနကို
ပြည့်ဝမဏ္ဍိုင် စောင့်ထိန်းနိုင်မှ
ရခိုင်ပီဟု ၀ိဂြိုဟ်ပြုခ
စာစုသခင် သမိုင်းတွင်ရေ
အသျှင်နာဂိန္ဒ ဆိုဆုံးမဖို့ 
ဗျာလ္လစီးလို့  လာဗျယ်ထော …..။

------
စစ်တွေ ညိုသန့် 

Friday, May 15, 2009

အချိန်တန်ကေ သားနားလည်လာလိမ္မည်

သားနန့်အမိမေတ္တာတရား
အငြင်းလုစရာစကားကမဟုတ်..။

အဝေ ! ငါ့သား
အမိမေတ္တာယုံမှားစရာဟိလို့လား...။

မလိုချင်ဘဲနန့်ရာ
ရလာရေသားလေ့မဟုတ်...။

နို့ရင်လို့နီမရ
သက်သာအောင်လို့်ရာတိုက်ခရေ
နို့ရည်စက်တိလေ့မဟုတ်...။

ရင်ထဲကလာရေ
ငါသားချေဆိုရေစိတ်ကအရင်းခံ
ကရုဏာတရားတိမွှန်းပနာ...။

အိုင်း !
ပြောစရာဆိုလို့
မျိုးဆက်မပြတ်စီဖို့ဆိုရေ
အတ္တချေတခုအတွက်ဒေါ့ခါ
အပြစ်တင်ကေလေ့အမိခံဝံ့ရေ...။

အမျိုးဘာသာအတွက်ရာဖြစ်လို့
အမိလိပ်ပြာသန့်ရေဝေ ။ ။

၁၅-၅-၂၀၀၉
ကိုမင်း

Thursday, May 14, 2009

မင်းသာသိကေ

မိုင်ပေါင်းထောင်ချီဝီးနီလို့
မင်းကိုတွိ့ဖို့အတောင်ပံတိမဟိရေဘဝမှာ
မင်း၏ ချိုမြရေအသံကိုမကြားရရေနိန့်
ရင်မှာခြောက်သွိသွိနန့်ပါ…..။

မင်းကိုမတွိရကေလေ့
မင်းအသံကိုကြားနိန်ရရုံနှင့်
ကြေနပ်နိန်ရရေဘဝမှာ
ငါက
မင်းဘားကဖုန်းအလာကိုမျှော်
တကိုယ်တော်ဘဝနန့်……။

အဖော်ကွဲရေငှက်တကောင်ပိုင်
မင်းနန့်အဝီးတနိန်ရာမှာဟိနိန်ရေ ငါက
မင်းပီးထားရေဓာတ်ပုံတိကိုကြည့်ယင်း
မင်းပီးထားရေတေးခြင်းတိကိုနားထောင်ယင်း
ငါ့၏ အိပ်ပျက်ညဥ့်တိကို
ကျော်လွန်စီခ…….။

မင်းဘားကဖုန်းမလာရေနိန့်တိမှာ
တခါတလီ
ငါစဉ်းစားမိရေ..
“အခုလောက်ဆိုဂေ…
မင်းက အခြားတစ်ယောက်နန့်
တွဲပျော်လို့ဟိလီဖို့”လို့….။

တခါတလီ
ငါစဉ်းးစားမိရေ..
“မင်းနန့် ငါရို့၏အကြားမှာ
ဘဝတံတိုင်းတိကာဆိုင်းနီလို့
ပေါင်းဆုံဖို့ဆိုစွာကဂါး
ဖြစ်လာနိုင်ဖို့လား”လို့….။

ပြီးကေ…
မင်းရို့၏ဂုဏ်တံတိုင်းအောက်မှာ
တဘဝလုံးအယှုံးသမားဘဝနန့်
ယှုံးးနိမ့်နီရဖို့ကို
ငါကြောက်မိရေ……။

ငါက..
မင်းကို
ပြောချင်ရေစကားတိ
အများကြီးဟိကေလေ့
မင်းကိုဖွင့်ပြောရဲရေအားအင်သတ္တိတိ
ငါ့မှာ မဟိ…..။

ဇာဖြစ်လို့လဲဆိုကေ…
ယင်းစကားကိုမင်းကြားရရေနိန့်
မင်းက ငါ့ကို
ခါးသီးစွာမုန်းရေနိန့်များဖြစ်လီဖို့လားလို့
စိုးရိမ်မိလို့ပါ…..။

ငါ့ဘဝမှာ
မင်းကိုမှရူးမူးစွာနန့်
အချစ်ဦးအဖြစ်ချစ်မိရေ
ငါက
အကယ်၍များ
မင်းနှုတ်ဖျားက“မုန်းရေ”လို့ပြောလိုက်ဖို့ဆိုကေ
ယင်းအမုန်းတိကို ပွေ့ဖက်ယင်း
ငါ ဇာပိုင်ရှင်သန်ရဖို့လဲ
ချစ်သူ….။

အခု…
ငါ့ရင်ထဲမှာ
ဇာလောက်ခံစားနိန်ရရေဆိုစွာ
မင်းသိဖို့မဟုတ်ပါ…
ပြီးကေ
ငါ့…မင်းကို…
ဖွင့်ပြောချင်ရေစကားတိကိုလည်း
မင်းသိဖို့မဟုတ်...။

အကယ်၍သာ မင်းသိပါကေ

“……………………………..”…..။

မောင်သာလှ

၃၀-၃-၂၀၀၉

အလိုတော်ရိများသို့

မြန်မာအငုတ်ကို အဟုတ်ဟုထင်
လုလင် ဘ၀င်မြင့်မြင့်
စပ်ငြင့်ငြင့်
ဝမ်းကြင့်နီပျာလား --။

(သာလှဦး)

Tuesday, May 12, 2009

စိတ်ရူးရေ

မိုးမင်းညို
မရွာတချက် ရွာတချက်
ကြောင်းပျက်တေလေ --။

မောင်လူပျို
မလာတရက် လာတရက်
စိတ်ပျက်တေလေ --။

ချောင်းဖြားရီ
ချောင်းရီတထူး
အညာခွင်ကို မ၀င်ဖူးကေ
ဖြားရူးရေလေ --။

ညရီတလီ ညဥ့်ရီတထူး
မောင်လူပျိုလေ
မေ့အိမ်ကြောက်ကို မ၀င်ဖူးကေ
စိတ်ရူးရေလေ --။

(ရမ်းဗြဲကျွန်းမှ ဇမ်းကဗျာ)

နွားလိုက်လားရေ

နွားပတုန်းရာလည်း တွဲတွဲ
မိနှင့်ဖမှာ မွီးစပ်တေ
နွားချေနောက်က
မလိုက်ခင် မိခင်ကဆဲ --။

ခလောက်ကိုယူ ချစ်တေသူ
နွားဖြူနောက်က
မက္ကလာ နံမှာကျိုက်လို့
နွားလိုက်လားရေ --။

(ရမ်းဗြဲကျွန်းမှ ဇမ်းကဗျာ)

ပန်မရွှတ်

တခွန်းခေါ် အိုလေရွှီနား
နှစ်ခွန်းခေါ် အိုလေရွှီနား
သုံးခွန်းတက်မှာ
မောင်ခေါ်သံ ညံညံကြားလို့
ဘုရားထူးရေ --။

ဘုရားဆို အလိုမဟိ
တရားဆို အလိုမဟိ
ပုချေဆို အလိုဟိ
ခေါ်မိစွာရာ --။

လပကောင်းယာ
တောက်လီယာ
လာရာလာလတ်
ပြန်မရွှတ်ပါ မောင်းမောင် --။

(ရမ်းဗြဲကျွန်းမှ ဇမ်းကဗျာ)

လိုက်ဝံ့ဖို့လား

နပျိုးရာလေ တပင်
ဂရင်ရာလေ တပုဒ်
နှင်းမကြွီ လီမသုတ်
ဆင်ပုတ်ရပ်သို့
ရည်မှတ်လာ ပြောပါဖို့လား
ချစ်တေမောင် ပြောစကားကို
မေစိုင်းစားလား --။

သင်္ဘောမာလိန် ရီကိုချိန်
မာလိန်သင်္ဘော
သောင်းသောင်းကျော် ဖောင်တော်ဦးက
လက်မှတ်စာ မောင်ထုတ်ပီးလို့
မလိုက်ဝန့်ပါ --။

အမိခေါ် နောင်တော်မြစ်ကို
မလိုက်ဝန့်ပါ --။

အဖခေါ် နောင်တော်မြစ်ကို
မလိုက်ဝန့်ပါ --။

ချစ်သူခေါ်
လူမတူ မယူမြစ်ကို
လိုက်ဝန့်ဖို့လား --။

(ရမ်းဗြဲကျွန်းမှ ဇမ်းကဗျာ)

ရောက်လာလိမ့်မည်

ခမောင်းသုံးကြိမ် ကျေးသုံးကြိမ်
သံဂလိမ်သုံးဆင့်
တောမှာဝီကေ ဆင်ဝေပွင့်
ငုံးပန်းပွင့်ယာ --။

ယင်းပိုင်ချိန်ခါ ထီးကိုကိုင်
ရွာစိုင်လျှောက်လို့
ရောက်လာလိမ့်မည် --။

(ရမ်းဗြဲကျွန်းမှ ဇမ်းကဗျာ)

အဆုံးစွန်

ဝဲလီပျံလီ သံဂလီ
ပျံလီငှက်ခါး
ကိုင်းဟောင်းကျိုးလို့
ကိုင်းသစ်ရှာ
ရပါဖို့လား
မေစိုင်းစား --။

အဆုံးစွန်ကေ
လက်ပံယေ ကိုင်းမှာ
နားဖို့ကျရေ --။

(ရမ်းဗြဲကျွန်းမှ ဇမ်းကဗျာ)

ဆုတောင်းရေ

ရမ်းဗြဲမာန်အောင် ကျောက်ဖြူသံတွဲ
စနဲရွာ ခေါ်သည်ရပ်မှာ
စောမဲကျီ တည်ရေဓါတ်ကို
ဖူးကတ်ခီမည် --။

ဆီမီးတတိုင် နှစ်ယောက်ကိုင်
ပျိုင်တပေါက်မှာ
နှစ်ယောက်ထိုင် တူပြိုင်ညှိလို့
ဆုတောင်းကတ်မည် --။

ဆုမကောင်း
ဖျက်တောင်းကတ်မည် --။

ပန်းမစင်
ဖျက်တင်ကတ်မည် --။

မကောင်းကြံ ဖီးရန်မှုကို
ပြုခလို့လား --။

ပန်းမစင်
တင်ခလို့လား --။

ဆုမကောင်း
တောင်းခလို့လား --။

ငှက်မောင်နှံ ပျံကာဝဲ
ကျိမ်ဆဲလို့လား --။

သူ့ရည်းစား
ခွဲခလို့လား --။

သနားဖွယ် ပုချေမေနှင့်
ဒေဘဝေ ဒေဘ၀မှာ
မပေါင်းရကေ
နောင်ဘဝေ နောင်ဘ၀မှာ
ပေါင်းရလီယောင်
မြတ်စိန္တေ ထံတော်ပါးမှာ
ဆုတောင်းရေ --။

(ရမ်းဗြဲကျွန်းမှ ဇမ်းကဗျာ)

ကျမျက်ရည်

လပြာသို ခွာညိုပွင့်သစ်
မောင်လူပျို မေမချစ်ကေ
ဝေးပစ်ဖို့လား --။

မောင်လူပျို မေမချစ်
ဝေးပစ်သောခါ
တဇာဇာ ငိုခါမျက်ရည်
ကျမျက်ရည် ဆည်မရလို့
မောင်လှသက်နှံ ပျိုမောင်စံ
ဝေယံနန်းမှာ
ဘယ်ကိုကိုလေ ဘယ်ကိုစောင်းလို့
ဘယ်စောင်းမျက်ရည် --။

ညာကိုကိုလေ ညာကိုစောင်းလို့
ညာစောင်းမျက်ရည် --။

သပေါ့ဖျာ မွိရာထက်မှာ
တံဘက်ဖြူ ယူကာအုပ်လို့
ကိုယ်သုတ်ရရေ --။

(ရမ်းဗြဲကျွန်းမှ ဇမ်းကဗျာ)

မေတပြည် မောင်တကျွန်း

အယင်ကခါ
ဗာရာဏသီလေမင်းကြီး --။

ရွှေသမင် အားတင်လိုက်ကေ
တောနက်ကလွန်
လူဝံလေမနှင့်
အကြောင်းဆုံ ငြင်းခုံရာလည်းမလွတ်
နဖူးစာ ပါသည့်ဝဋ်ကို
ချွတ်မကျွတ်ယာ --။

မေကားတပြည် မောင်ကားတကျွန်း
မြစ်အလယ် ပိုးခြည်တန်းယောင်
စာကမ်းကတ်မည် --။

(ရမ်းဗြဲကျွန်းမှ ဇမ်းကဗျာ)

တမ်းလွှဲဇမ်း

အမောင်အမောင် တိုင်မှာမျှောင်
အမောင်ဇာကရောင် --။

သရက်ပင်ညို ရွက်ရိပ်ခို
လူပျိုပေါက်စ တန်းလွှဲက --။

ကျောက်စရစ်ကေ တန်းတင်
လီရွှင်ကေ သွတ်သွတ်
ပျိုမေရီ ပြင်စိုင်ကေဖြတ်လို့
ရီခပ်ကေ ထွက်လာ
ဘူးပွင့်ရံ ကြာတံပွင့်ကို
တွဲလို့ပါ --။

လူမြင်ကေ ရှက်တေမချိ
ဘူးပွင့်ရံ ကြာတံပွင့်ကို
ရွှတ်ပါဖိ --။

ခယင်ဝါးရှည် ခယင်ဝါးဖျား
တဆစ်ချေကို ဖြီလို့ထွင်း
စံညှင်းကေ ပုလီ
လက်ဆယ်ချောင်းနှင့် ခြောက်ချောင်းချီ
ပုလီစံကျော်
မေရို့နီ အိမ်တောင်ဖက်က မှုတ်ပျာခေါ်
နာပျော်ရေလား
မေ့အသံကို တပ်တပ်ကေ ကြားရေ --။

မေရို့အိမ် မီးလုံးလင်းလို့
ချစ်တေမောင်မှာ မ၀င်ဝံ့ဘဲ
ခြံနားကေ ယောင်လို့ --။

(ရမ်းဗြဲကျွန်းမှ ဇမ်းကဗျာ)

ဇမ်းဖွဲ့ကတ်မည်

အသက်ရှည် လှမေရို့နှင့်
နားမလည် မချေရို့နှင့်
ဒေရက်ဆုံ ဒေပြင်ဝန်းမှာ
ဇမ်းဖွဲ့ကတ်မည် --။

ကျောင်းပါးကတောင်
ရွှီကျောင်းတောင် ဖိုးခေါင်ကြိမ်လုံး
တစိတ်ကာ လူမသုံးကေ
အမြုံမလေ --။

လီယင်ယင် ဆားပြင်စမှာ
ယက်သဲ့ဘောင် ကိုင်ကာထိုးလို့
ငါးယိုးရေလား --။

တရက်ရှာ နပ်စာမပြည့်
ထိုးရေကွန်ချာ
ပုဇွန်ဖြူ မေမစားလို့
ဂြိုးသားရှာခီ --။

ညွန့်ဆယ်ပင် တပင်ပြတ်
မောင်လက်ချယာ ပုယေ --။

သစ်ခ၀ပ်ရာလည်း ပွင့်ဖြူ
မအူရာလည်း ပင်ဖျား
အကိုင်းချေမှာ ငှက်ဝါနားကေ
ရည်းစားဟိလား ပုယေ --။

ကြက်သွန်ပင် အသျှင်မဲ့
ငှက်ဟင်္သာ ပျံကာဝဲ
ရည်းစားမဟိ --။

သဲသောင်သဲသောင် ရွှေသဲသောင်
သဲသောင်ထိပ်မှာ
ဗျိုင်းဟောက်ကေပိုင် ငိုက်လို့
တမန်းပြင် ငါးကိုချောင်း
ရကြောင်းမမြင် ချောလေ --။

ချောင်းဖျားပုစွန် လိမ္မာခံ
ပုဇွန်လိမ္မာ ဗျိုင်းအစာ --။

မောင်နှင့်မေ အတူတူ
လူချင်းကွဲလို့
စိမ်းကားရေလား ချောလေ --။

ပင်နန်းရိပ်ခို လှမေပျိုကေ
ရယ်ချိုပြုံးပြုံး သွားသန္တာကို
ပုဝါဖုံးလို့ မျက်လုံးပရိယာယ်
ချစ်ဖွယ်ပြောလို့
စကားချိုရေ ပုယေ --။

(ရမ်းဗြဲကျွန်းမှ ဇမ်းကဗျာ)

မှာလိုက်ရစီ

မေ့သခင်မှာ ကြင်ရာသက်ထား
ချစ်တေသူ ဖြူချောချောလို့
ကိုယ့်ရည်းစားကို
မချစ်ဆို မလိုလို့လား
မခင်ပုံ မယုံစားလို့
မအပ်ဝံ့လား --။

မချစ်ဆို မလိုမဟုတ်
ပျိုမေယေမှာ ရွှီကိုလို
ဂုဏ်ကိုမက်လို့
ချစ်ပါရေလား
ရွှီမလို လူကိုမက်လို့
ချစ်ပါရေလား --။

ရွှီကိုမလို ဂုဏ်ကိုမမက်
မေအပျိုမှာ လူကိုမက်လို့
မောင်လူပျိုကို ယုံလိုကြောင်းနှင့်
တောင်းထားဖို့ယာ --။

မယုံရရေ ယုံရရေ
စကားကြွယ်ကေ ဟုတ်မည်နှမ
မိမ္မဥာဏ် ၀င်္ကန္တကို
ကြောက်ရပါရေ --။

လှလူပြောင် မောင်ကုသနှင့်
ရူပ၀တီ ဥုံဒဏ္ဍီမှာ
ပုံသီတချက်
ချစ်ကျွမ်းဝင် ကြင်သူလက်ကို
ကျောက်မျက်စိန်ပျံ
ရွှီပြည်တန်ကို အပ်နှံဖူးကြောင်း
ရှိထုံးပုံ နိဂုဏ်းဟောင်းကို
ထောက်ဆယေကြည့်ပါ --။

ပုံပြရေ ယုံဖွယ်စကား
ရူပမယ်လေ သူ့လက်ကြားက
ပုဏ္ဏားဦးယူ အသဲဆူဗျာ
စိတ်ပူမဆုံး
ကိုယ်လိုရာ ရတနာကုံးကို
အဆုံးယေချလို့
ကုသမောင်မှာ ဖြစ်ပုံကြောင်းက
ကောင်းယင့်လားယေ --။

မကောင်းရာ ဖယ်ကာယေထားပါ
ဘေးကယေပါးလို့
ကိုယ့်ရည်းစားကို အပ်ထားခပါ --။

ဂရုဏာ မိတ္တာသက်ပါ
စုံမက်သော်လည်း
ရှက်စဖွယ် ရွှီငွေအပ်လို့
တယောက်မေ ပျိုမေစစ်မှာ
မဖြစ်နိုင်ပါ --။

ချစ်တေယောင်ယောင်
ကြိုက်ယောင်ယောင်နှင့်
အဂယောင့်မှန် ဧကန်ကျက
နောက်ကိုယေဆုတ်လို့
မဟုတ်မမှန်
အကောက်ဥာဏ် ၀င်္ကန္တမှာ
ပျိုမေယေ အကယ်မှတ်လို့
တပတ်ကေကျရေ --။

အလှမဉ္ဇူ သရဖူ မြင်သူသဲစွဲ
မက်မပြေ သက်ရွှေခဲကို
မခွဲဝန့်ပါ --။

မြှောက်ရေပင့်ရေ ပြောတတ်တေ
လူလည်လူနောက်
လူကျွမ်းဝင် လူပင်ပေါက်လို့
အကောက်ကိုကြံ
ခဲမှန်ဖူးရေ စာသူငယ်
ရွယ်ရုံနှင့်လန့်
လှမယ်ပျို နောက်ကိုတွန့်လို့
မချစ်ဝန့်ယာ
မရယာ လက်သာချဖိ
သူများယူ လက်ပူတိုက်ပျာ
ကျန်လိုက်ပတ်စီ --။

အသက်ထပ်တူ မငြူစူ
ကြည်ဖြူသဲစွဲ
ချစ်တေသူ ဖြူပုလဲကို
ပီးပါလတ်မည်
သနားချစ်ခင် မိတ္တာဝင်
ကြင်နှမကို စိတ်ချရစီ --။

စကားဆက်ဆံ လက်မခံ
ဖီဆန်ငြင်းလို့ ချစ်ယင့်နှင့်ပင်
မေအပျို ရလိုရေးနှင့်
ပြောမိစွာရာ
မေ့သခင်မှာ မှန်ကိုကိုးလို့
စိတ်မဆိုးကဲ့ --။

သိုင်ခေါင်လည်းလွန် ကြက်လည်းတွန်
မောင်ပြန်ဖို့ယာ
မေစိတ်ကေသာအောင်
ပဒုန်းကျော် လီခေါ်ပေါက်က
မောင်မျက်နှာ ထွက်ခါငုံ့လို့
ပြုံ့ပြခမည် --။

ပုဆိုးယေကွက်ပြာ ကွက်တရာ
ခြူခြာသတ်လို့
နပျိုးပင်ကို စုန်လီသတ်ကေ
မိုးလင်းပတ်စီ --။

အာရုဏ်တက်လာ ရောင်ဖြူလာလို့
လူရာလေ ထစ
ချစ်တေမောင်မှာ အသရေရအောင်
ပြန်ရဖို့ယာ --။

ပြန်မည်ဆို ပျိုယေနှမ
ချစ်တေမောင်လေ
ဆံစညို ပျိုယေမက
မှာလိုက်ရစီ
ညနီရီ နီဆီရောက်အောင်
လားပါလီ --။

(ရမ်းဗြဲကျွန်းမှ ဇမ်းကဗျာ)

မောင်ပြန်ဖို့ယာ

မိုးလင်းကြယ်ကြီး
ရောင်ဖြူလာ ထွက်ခါနီး
ကြက်ကြီးလည်းတွန်
မိုးသောက်ယံ မောင်ပြန်ဖို့ယာ --။

မောင်လားရေခါ
ဆံကေသာ ဖြီကာလျှော့
ကန်တော့လိုက်ပါ --။

ကတိုးတိမ် စိုးရိမ်နှောင်းလို့
မကြောင်းကြကဲ့ --။

ဂြိုးချေကြူ
မပူလီကဲ့ --။

ငှက်တော်ထိုး
မညှိုးလီကဲ့ --။

ကျီးကန်အာ
မရှာလီကဲ့ --။

ဥသြမောင်
ဖိုးခေါင်တယောင်
မတလီကဲ့ --။

ချစ်တေဆို ပျိုနှမကို
မှာခရေနှောင်း --။

နှစ်ချောင်းချီ ဗွီလီယှက်
ရက်သပေါ့မှာ
ရွှီမျက်တောင် အသာမှိတ်
အိပ်ဟိလိုက်ပါ --။

အိမ်နောက်ဆို မောင်းကာအောက်က
မေအိပ်ရာကို မျှော်ကာကြည့်
ပြန်လှည့်လားယာ --။

နှစ်ချောင်းချီ ဗွီလီယှက်
ရက်သပေါ့မှာ
ရွှီမျက်တောင် အသာမှိတ်
မအိပ်နိုင်ပါ --။

မတွိလီရ မမြင်ရလို့
ကားရုပ်ပုံ ဆယ်စုံချ
ရူပဒေ၀ါ နတ်ထံထံလေ
တူပြန်ခကေ
ငယ်ကချစ်တေ ချစ်မောင်မောင်ကို
ကြိုက်မ၀ပါ --။

(ရမ်းဗြဲကျွန်းမှ ဇမ်းကဗျာ)

မယ်နှင့်မောင်

အထက်မှာရာလေ သံဖြူ
အောက်မှာရာလေ ပျိုင်ချပ်
အလယ်ဂေါင်မှာ မှန်ဘောင်သပ်လို့
ဗောဓပ်ကျောင်းမှာ
အပွင့်မှာရာလေ ၀ါဝါ
အညှာမှာရာလည်း မဲမဲ
ပန်းမစင်ကို တင်မိခလို့
မေနှင့်မောင်မှာ မပေါင်းရဘဲ
ကွဲရရေလား ပုယေ --။

ဒေဘ၀ီ ဒေဘ၀မှာ မပေါင်းရသော်လည်း
နောင်ဘ၀ီ နောင်ဘ၀မှာ ပေါင်းရလီအောင်
တရိစ္ဆာန် အမှန်ရာလည်းစင်စစ်
ငှက်လီလီလေ ငှက်ပင်လည်းဖြစ်ငြား
မောင်ကားဂြိုးဘို မယ်ကားဂြိုးမ
တလင်းရာမှာ ၀ဲကာကျကေ
စားရပါစီ ပုယေ --။

တရိစ္ဆာန် အမှန်ရာလည်းစင်စစ်
နွားလီလီလေ နွားပင်လည်းဖြစ်ငြား
တသျှိုင်းတည်းထွန် တခြံတည်းနွား
တခုံးတိုင်မှာ ချိုင်ကာထားကေ
စားရပါစီ ပုယေ --။

ဘုရားပေါ်ကေ ကံ့ကော်တောသို့
မေယင်ယင် မေယင်သော်လည်း
မေစောင့်နီဝေ
မောင်ယင်ယင် မောင်ယင်သော်လည်း
မောင်စောင့်နီမည် --။

ဆီမီးရာလေ တတိုင်
ပန်းတခိုင်နှင့် ပျိုင်တချပ်မှာ
နှစ်ယောက်ထိုင်ကေ တူပြိုင်လောင်းလို့
ဆုတောင်းကတ်မည် ပုယေ --။

(ကျောက်ဖြူနယ်မှ ဇမ်းကဗျာ)

ပူဆိပူဆာ

ကိုင်းလီကိုင်းလိုင်း
သစ်ကိုင်းထက်မှာ ဗျိုင်း --။

ဗျိုင်းကားဇာဖို့ နားရုံ
ငါးမြင်လို့ နားရေရာ --။

ငါးကဇာဖို့ ပေါ်ရုံ
ရီနောက်လို့ ပေါ်ရေရာ --။

ရီကဇာဖို့ နောက်ရုံ
ကျွဲစိမ်လို့ နောက်တေရာ --။

ကျွဲကဇာဖို့ စိမ်ရုံ
ပိုးကိုက်လို့ စိမ်ရေရာ --။

ပိုးကဇာဖို့ ကိုက်ရုံ
မိုးရွာလို့ ကိုက်တေရာ --။

မိုးကဇာဖို့ ရွာရုံ
ဖားအော်လို့ ရွာရေရာ --။

ဖားကဇာဖို့ အော်ရုံ
မြွီမျိုလို့ အော်ရေရာ --။

မြွီကဇာဖို့ မျိုရုံ
ပူဆိပူဆာ မနီသာလို့ မျိုရေရာ --။

(ဗိုလ်မင်းထောင်မှ ဇမ်းကဗျာ)

အရူး စိတ်ကူး

မိုးမမြင်၊လီမမြင်
ရွာပြိုအောင်
ချစ်မိခါ ပြီးမှ
ပန်းပန် ရနိုးနိုး
ပင်မြင့်ကို
မျှော်ကြည့်နိန်ရရေ
ဘ၀မျိုး
ငါစိတ်နာရေ...။

တစ်ခုကိုလေ့
လက်ကိုင် မရရေ
ဒေ လူ့ဘ၀မှာ
ဇာချင့်ကို မဆို
ငါ လိုချင်ရေပိုင်
ပြောင်းလဲလို့ရနိုင်ဖို့
ဘားမီး ဘားကရားပိုင်
စွမ်အင် သတ္တိ တစ်မျိုး
ငါရကေ ကောင်ဖို့ နှ..။

ရုပ်၊ နာမ်
ဖြစ်ပျက် သခါင်္ရ
ဆိုစွာတိရေ
ဘုရားဟောထားခရေ
မမြဲရေ တရားတိရာလို့
ငါ သိကေလေ့
မနုဿတ္တ ဒုလ္လဘ
ရခဲ့ရေ လူဘ၀ တစ်ချက်ချေမာ
နင့်ကို သီအောင်ချစ်တေဆိုရေ
အကြောင်းတိကို
ရီမရောရေ
ရခိုင်သံ ပပေါက်နန့်
ကဗျာ စာတိရွီးလို့
ငါ နိန့်တိုင်ပြောပြချင်ရေ ...။

ယကေလေ့...
အိမ်မက်နန့် ဘ၀
ဆန္ဒ နန့် ပစ္စုပ္ပန်
တထပ်တည်းမကျ သိမ့်ရေ
ငါ တစ်ယောက်
ကျားပါးစပ်ပိုက် ထဲကို
ဝင်ပါလားရေ
ငါးတစ်ကောင် ခံစားချက်တိနန့်
ရှင်သန်နိန်ရရေ။ ...။

အော် ...
ဒေပိုင် ယူဇနာပေါင်း
ရွီလို့မရရေ
နင်နန့်ကွာဝီးနိန်ရေ ဘ၀မှာ
ရီမြုပ်ရေလူ ရစွာလိုက်ဆွဲရေမျိုး
“နင့်ကိုငါ
တာနောယက္ခ ဘီလူးကြီးပိုင်
ခြုပ်ထဲမှာ ထည့်လို့
မှုံ(လှောင်)ထားလို့ရကေ
ကောင်းဖို့မလားဂု”လို့
ဆီးဆောက်ကရောက်
ငါ တွေးမိယင့် ...။

အေးမောင်(ရင်အုံတော်ဓာတ်)
၁၁၊၀၅၊၀၉(၂၂:၁၁)

Monday, May 11, 2009

ထာဝရမဲ့ကမ္ဘာ

ထာဝရမဟုတ်တေ
သံတစ်ချောင်း၏ ဟန်ချက်နန့်
လည်နီရေ ဂျင်ကလေ့
ထာဝရမဖြစ်နိုင်ပါ။

ထာဝရမဟုတ်တေ
အုန်းလက်တိကြားက ကျီးငှက်၏
အသိုက်ကလေ့
ထာဝရမဖြစ်နိုင်ပါ။

တာဝရမဟုတ်တေ
နိန့်နန့်ညကြားက လူသား၏
အသက်ရှူသံကလေ့
ထာဝရမဖြစ်နိုင်ပါ။

နှစ် (၂၀၀)ကျော်တိုင် ကျွန်ပြုခံရေ
အာရီယန်ကလေ့
ထာဝရမဖြစ်နိုင်ပါ။

ရဲမင်းဘော် (AASYC)

ရောင်နီကိုတမ်းတခြင်း

မည်းနက်အမှောင်ကျနီရေ
မဟူရာညတစ်ည၏
သန်းခေါင်ယံမှာ
တရီးနိုးထအော်လိုက်တေအသံ
အိပ်မှုန်စုံမွှား
ထလို့ ယောင်စွာလား
ကြောက်စရာအိမ်မက်ထဲက
လန့်နိုးလာစွာလား
မှုန်တိမှုန်ဝါး
မျက်လုံးအစုံက မှေးစင်း
အားတင်းဗျာယ် ဖွင့်ကြည့်မိရေ
စူးစူးဝါးဝါးနန့် 
ညီးသံတိ
ကြိုင်းသံတိ
အော်သံတိ
ကူပါ ကယ်ပါ တစာစာနန့် 
လောကငရဲမှာ
ကျိန်စာသင့်
ဒုက္ခအပေါင်းနန့် 
ခညောင်းနီကတ်ရရေ --။

ရောင်စိုင်မဟိရေညမှာ
မှုန်ပျပျကြယ်ရောင်နန့် 
အမှောင်ကို အံတု
ရောင်နီဦးကို ဆန္ဒပြုယင်း ခရီးဆက်
လမ်းပြပီးပါ
အို....လမ်းပြကြယ်။

စောမြဇံ
ရခိုင်ပြည်

“မင်းနှလုံးသားနန့် ငါ့ခန္ဓာ”

ဖဲသာမပီးရတိုင်း
ထ ထ ဟောင်တတ်တေ ခွီးပိုင်
တ၀ီဝီအော်နိန်ရေ ဆောင်းလီပြင်းနန့် 
လေးဖက်လေးတန်က အအီးဓါတ်တိ
ဟဲလ်ဗီးမက်တယ်လ်တေးခြင်းကို ဆိုပနာ
တလားကနိန်ရေ ညဥ့်
ငါ့ရင်ဘတ်က
မင်းကို လွမ်းနိန်ရေ လခြမ်းချေ …….။

နာမေမပီးရသိမ့်ရေ အနာဂတ်
ကုန်းရီစုတ်နိန်ရေ ပစ္စက္ခနန့် 
ဘ၀ကို ကြိုးညှိပနာ တီးကြည့်ရေ
တခုအသံလေ့ ထွက်မလာ
ယကေလေ့ မင်းကို ငါ လွမ်းရေ လခြမ်းချေ…….။

မင်းအသံကို ကြားကေပင်
ငါ့သွီးကြောမျှင်တိ အသက်ဝင်
ရိုးမရင်ပြင်က မင်းအလှ
စိတ်ကူးထဲမှာတောင် ကြည့်မ၀
လွမ်းနိန်ရရေ လခြမ်းချေ…….။

ရပ်ဝီးမြီခြား
ရာသီဓလေ့သစ်တိကြားမှာ
မင်းနှလုံးသားနန့် ငါ့ခန္ဓာ
မင်းအိမ်မက်နန့် ငါ့ကဗျာ
မင်းခြီရာနန့် ငါ့အတိတ်
အငိုမတိတ်သိမ့်ဝေ လခြမ်းချေ…….။ ။ ။


ဝံလက်ညို (ရိုးမ၀တီ်)

“အလင်းရှာပုံတော်”

နှစ် နှစ်ရာကျော်
အလင်းချေတစက်
မမြင်တွီ့ ခရ…….၊

ဒေကောင်းကင်ကြီးက
အမှောင်ထဲမှာ
အမဲရောင်မိုးတိ ရွာချ…..၊

ဒေနံရံတိက
အနက်ရောင်ဆီးသားတိ
မွမ်းမံချယ်သ ….၊

ဒေဂျောင်ချေထဲမှာ
ငါ့ဘ၀က ငါ့ကိုမသိ
ငါ့အသိစိတ်က ငါ့ကိုမမြင်
ငါ့ရင်ဘတ်က ငါ့ကိုမချစ်
နွံနစ်နိန်ရဗျာယ်ဝေ……၊

လူဆန်ရေ အကြင်နာတရား
မကြားဖူးစွာ ကြာလို့ 
အဘိဓါန်ထဲမှာတောင်
ယင်းစကားလုံးမဟိလိုက်ဗျာယ် ……၊

ထောင့်ပေါင်းစုံက
ဖိနှိပ်ပိတ်ဆို့ သွီးစုပ်ရက်စက်ခြင်းတိ
အညာရီပေါက်တေပိုင် တိုက်စား
မတန့် တမ်းစီးဆင်းလားနိန့် ယင့် ……၊

ယကေလေ့
တူရေဒုက္ခ
ကိုယ်စီကိုယ်ငှနန့် 
ငါရို့ တိ …. ငါရို့ တိ
လက်ချင်းထပ်ပနာ
အလင်းရှာကတ်မေ………..၊

ယုံကြည်ခြင်းရင်ပြင်ထက်မှာ
နှလုံးသားအလင်းဟိစွာ ကျိန်းသီရေ။ ။ ။


ဝံလက်ညို(ရိုးမ၀တီ)
၁၅၊၁၊၂၀၀၉

သီတမ်းစာ အမှာစကား

နိုင်ငံပျောက်နိန်ရေ
ရာစုသစ်ပင်ထက်က
အိမ်မက်တိ
ဖူးပွင့်ရင့်မှည့်ခွင့်မရပဲ
ကြွီကျနိန်ရရေ....။

အသားနာဖို့ စွာကိုကြောက်လို့ 
လှီးမထုတ်ဝံ့ရေ
ကျွန်တံဆိပ်အမာရွတ်တိ
ဒေခန္ဓာအရီပြားထက်မှာ
ငါ့သွီးကိုစုပ်ပနာ
အသက်ရှင်နိန်ကတ်ယင့်...။

နှာခေါင်းအငှားနန့် 
အသက်ရှုနိန်ရရေ ငါ့အတွက်
ကမ္ဘာ့လီထုက
အာဟာရတိပျောက်
အိတ်ပေါက်နန့် ဖါးကောက်တေပိုင်
ရီရောထားရေ အချိန်ကိုသောက်ပနာ
နီဝင်နီထွက်ကို ကော်ဆဲလို့ 
ယစ်ကွန့် ဆောင်နိန်ရရေ....။

မျက်စိတိမှုန်သွားတိကျိုးနိန်ရေ ငါ့ကို
ပြောင်းလဲခြင်းတရားက လက်တို့ လို့ ခေါ်ပနာ
အာရုံဦးအလင်းနန့် 
ကမ္ဘာ့ရွာသစ်ကို ဖွင့်လို့ ပြလိုက်တေနိန့် 
နောက်မကျသိမ့်ဆိုရေ အသိနန့် 
နောက်လာနောက်သားတိကိုမှာချင်ရေ...။

ငါ့ပိုင် ကံကြမ္မာကိုမပိုင်ရေ လူ
ငါ့ပိုင် အနာဂတ်ကိုမျှော်မကြည့်ခရေ လူ
ငါ့ပိုင် မျိုးဆက်သစ်ကို မချစ်တေ လူ
ငါ့ပိုင် ကိုယ့်စံကိုယ့်ဟန်ကို မမြတ်နိုးခရေ လူ
ငါ့ပိုင် ဘ၀တထွာချေမှာ အဆီယစ်ပနာ အမျိုးကိုပစ်ခရေ လူ
ငါ့ပိုင် ကိုယ်ပိုင်ရေနိုင်ငံကို ပြန်ပနာမထူထောင်နိုင်ခရေ လူ
ငါ့ပိုင် ကိုယ့်ဝိဥာဉ်ကို ကိုယ်သစ္စာဖောက်တေ လူ
ငါ့ပိုင် ကိုယ့်သိက္ခာကို ကိုယ်မလေးစားရေ လူ
ငါ့ပိုင် ကိုယ့်လမ်းကြောင်းနန့် ကိုယ်မလားခရေ လူ
ငါ့ပိုင် ကိုယ့်စာပီစကားကို တန်ဖိုးမထားခရေ လူ
ငါ့ပိုင် ….
ငါ့ပိုင် ….
ငါ့ပိုင် လူကို ရခိုင်သားလို့ မသတ်မှတ်လီပါကေ့...။



ထူးမြတ်ခိုင်
၁၁၊၀၅၊၂၀၀၉

ရခိုင်ဆိုလျှင်

မုန့်တီငရုပ်သီးချက်နန့်
င/ခြောက်ဖုတ်ကိုရာကြိုက်ကေပင်
အချိတ်ကိုဝတ်ပြီး
သဇင်ကိုရာ ပန်ကေပင်
ငါ့စကားကို ငါပြောရေဆိုပြီး
ကျင်ဝါသနာပါကေပင်
ရခိုင်လို့ဆိုပါဖို့လား --။

မင်းညီမ ငါ့အစ်မရို့ကလည်း
သဇင်ကိုကား မပန်
ငရုပ်သီးချက်နန့် မုန့်တီစားနီစွာမှာလည်း
မင်းအမိ ငါ့အရီးမပါ
ယပိုင်ဆို မင်းနန့်ငါကား
ရခိုင်လား --။

ငါရို့အိမ်က သာလိကာ
ငါရို့စကားကိုရာပြော
ကျန်ရေစကားကို မပြော
သာလိကာကား ရခိုင်လား --။

ရှိကအသျှင် ကဝိအကျော်
ပညာမော်ရို့ သတ်မှတ်သမုဒ်
ရွီးဖွဲ့ပြောဆို ထားခစွာမှာ
"အမျိုးသီလ၊ နှစ်ဌာနကို
စောင့်စွမ်းပါမှ" ခေါ်ထိုက်ပါသည်
ရခိုင်နာမည် --။

(ပညာကျော်)

လူတော်လူကောင်း

တယောက်တည်းအပြေးပြိုင်
သူသာအနိုင်ရ --။

ပထမလည်းသူ
ဒုတိယလည်းသူ
တတိယလည်းသူ
ဆုတွေအကုန်းလုံးယူ --။

ဆရာသမား
သိပ်တော်ပါကလား --။

(သာလှဦး)

ဝက်ထီး

ဝက်ကိုအစာကျွေးစွာ
ချစ်လို့မဟုတ်ပါ --။

ခြံထဲက ၀က်ကို
ပိုးပိုင်မွီးစပ်
နိစိုင် အစာကျွေးကတ်တေ --။

ဝက်ကြီးက
တနိထက်တနိ တရက်ထက် တရက်
ထီးထီးလာရေ --။

ရီချိုးဗျာယ်
ခါးသပ်ပီးကေ
(၀က်ထီး) က
ကကောင်း ကျေနပ်နီရေ --။

သံဝေဂရစရာ
အများမကြာ
(၀က်ထီး) ကို လှံနန့်ထိုးခါ
ကျွီးလိုက်တေ ၀က်
ကမ္ဘာပျက်ယှောင် --။

ယပြီးကေ
အသွီးကိုထုတ်
အရီကိုဆုတ်
မီးဖုတ်ကြပ်တိုက်
(၀က်ထီး)
မျက်ဖြူဆိုက်ရပါဗျာယ် --။

နောက်ဆုံး လူတိက
ဝက်သားကို ချက်စားဗျာယ်
ဝက်ဂေါင်းကို
စွပ်ပြုတ်လုပ်ပစ်လိုက်တေ --။

(၀က်ထီး) ဘ၀
ပျက်စီးရပါဗျာ --။

(၀က်ထီး)
ဇာလည်းမတတ်နိုင်ပါဗျာ --။

(သာလှဦး)

တသက်လုံးပေါင်းမည်

တသက်လုံးပေါင်းမည်
(ရခိုင်ခွန်းတောက်)

ပန်းပိတောက် တ၀ီဝီ
ဖူးပွင့်စီရီ ဟိပြန်လတ်
အတာသင်္ကြန်ပွဲကိုလ
ဆင်နွှဲကတ်မည် တူပျော်ပျော် --။

မဏ္ဍပ်ထဲက အပျိုစင်
မိတ္တာရီစင် လောင်းပါလို့
ဒေနှစ်အတာ ပွဲမှာလ
အသဲနစ်အောင် လောင်းမည် --။

ချစ်သူအလှ ရခိုင့်တန်ဆောင်ကို
မောင်မောင်ရီစင် လောင်းချင်လို့
မဏ္ဍပ်တကာက လိုက်ရှာရ
ချွေးပြစ်ပြစ် ကျရေ --။

အဂုမှ တွိရစွာကို
မိတ္တာစေတနာ ထားပါလို့
ချစ်ရီစင်တပေါက်ကိုလ
သွန်းလောင်းလိုက်ပါ --။

ချစ်သူလောင်းရေ မြရီစင်
အသဲဘ၀င် အီးပါယင့်
အယင့်အယင် ပေါင်းရစီကြောင်း
ဆုတောင်းလို့ လောင်းပါ --။

ချစ်သူအလှ ပျိုကညာ
မာစီသာစီကြောင်းကိုလ
အကိုမောင်မောင်ကြီးမှာလည်း
ဆုတောင်းလို့ လောင်းရေ --။

မဏ္ဍပ်က ကိုယ့်ချစ်သူကို
ပျိုမောင်အမှန် မှာခပါယင့်
ကိုယ့်ရိုးရာ ယိုင်ကျေးမှုကို
အသက်ပီးလို့ ထိမ်းပါ --။

အမျိုးသီလ စောင့်သူကိုရာ
မိတ္တာစေတနာ ထားပါလို့
အကြင်နာဖက်ကာမျှ
တသက်လုံးပေါင်းမည် --။

စာဆိုတဦး
(15/3/74)

သောက်ခါမပြောကောင်း

အတိတ်က ရွှေထီးဆောင်း ငွေထီးဆောင်း
မင်းထီးမင်းဘာ ဝေသာလီသျှစ်သောင်း
ပင်းဝါချီစစ်ကြောင်း ဘင်းဂါချီစစ်ကြောင်း
သောက်ခါ မပြောကောင်း
ပြောခါ မသောက်ကောင်း --။

ဒေ၀န်းကြီးအကြောင်း အသျှင်ဥတ္တမအကြောင်း
ဦးရွှေဇံအကြောင်း ရဲကျော်သူအကြောင်း
အမျိုးဘာသာ သာသနာ မည်သည်မည်ဝါ
သောက်ခါ မပြောကောင်း
ပြောခါ မသောက်ကောင်း --။

ငါ့လိုင်ခြောင်း မင်းလိုင်ခြောင်း
တသီဖြည့်လို့ မပြည့်ရေလှိုဏ်ခေါင်း
စကားကောင်းနန့် တန်လားမတန်လားမသိ
ဝိုင်းမိကတ်ပျာယ်ဆိုကေ သာလို့ခြီ
ချောင်းကျ မြောင်းကျပေါင်း အလီလီ --။

သမိုင်းစာအုပ်ထဲက မင်းထီးမင်းဘာ
အေကနိမှာ ရှင်ပြီး နိုးထလာကေ
ရင်ကြီးကျိုးကျပါမည် --။

ငါ့ယောင်လည်းကောင်း သူ့ယောင်လည်းကောင်း
ယမကာနံ့တထောင်းထောင်း
လူပျင်းလူဖျင်း အငြင်းသန်အပေါင်းရို့ကို
သွားကျွတ် ပါးကျွတ် ပရွတ်နရွတ်
ထထွတ်ကြီလားအောင်
(ထည့်) ပလိုက်မည်လား မဆိုနိုင် --။

ယေကေလဲ့ အဆွေ
အေကဗျာကိုတော့
သောက်ခါလည်း ဖတ်ကောင်း
မသောက်ခါလည်း ရွတ်ကောင်းပါရေ --။

ရိုးမရင်သွီး
(23/10/2001)

မယ်နှင့်မောင်

အထက်မှာရာလေ သံဖြူ
အောက်မှာရာလေ ပျိုင်ချပ်
အလယ်ဂေါင်မှာ မှန်ဘောင်သပ်လို့
ဗောဓပ်ကျောင်းမှာ
အပွင့်မှာရာလေ ၀ါဝါ
အညှာမှာရာလည်း မဲမဲ
ပန်းမစင်ကို တင်မိခလို့
မယ်နှင့်မောင်မှာ မပေါင်းရဘဲ
ကွဲရရေလား ပုယေ --။

ဒေဘ၀ီ ဒေဘ၀မှာမပေါင်းရသော်လည်း
နောင်ဘ၀ီ နောင်ဘ၀မှာပေါင်းရလီအောင်
တရိစ္ဆာန် အမှန်ရာလည်းစင်စစ်
ငှက်လီလီလေ ငှက်ပင်လည်းဖြစ်ငြား
မောင်ကားဂြိုးဘို မယ်ကားဂြိုးမ
တလင်းရာမှာ ၀ဲကာကျကေ
စားရပါစီ ပုယေ --။

တရိစ္ဆာန် အမှန်ရာလည်းစင်စစ်
နွားလီလီလေ နွားပင်လည်းဖြစ်ငြား
တသျိုင်းတည်းထွန် တခြံတည်းနွား
တခုံးတိုင်မှာ ချိုင်ကာထားကေ
စားရပါစီ ပုယေ --။

ဘုရားပေါ်ကေ ကံ့ကော်တောသို့
မယ်ယင်ယင် မယ်ယင်သော်လည်း မယ်စောင့်နီဝေ
မောင်ယင်ယင် မောင်ယင်သော်လည်း မောင်စောင့်နီမည် --။

ဆီမီးရာလေ တတိုင်
ပန်းတခိုင်နှင့် ပျိုင်တချပ်မှာ
နှစ်ယောက်ထိုင်ကေ တူပြိုင်လောင်းလို့
ဆုတောင်းကတ်မည် ပုယေ --။

(ကျောက်ဖြူနယ်မှ ဇမ်းကဗျာ)

စွမ်းအားသျှင်

အကိုင်းချိုးလည်း၊ မညှိုးပင်ပျို
စိမ်းစိုစိုနှင့်၊ နဂိုအသွင်
စိမ်းရောင်ဆင်၏ --။

အပွင့်ခူးလည်း၊ အဖူးဝင့်ပျို
ရွှမ်းတင့်စိုလျှက်၊ နဂိုအသွင်
ရောင်စုံဆင်၏ --။

အရွက်ခြွီလည်း၊ မကြွီကိုင်းပျို
မိုးကိုမျှော်လျှက်၊ နဂိုအသွင်
လှရိပ်ထင်၏ --။

အကိုင်းအပွင့်၊ အရွက်လွင့်လည်း
တင့်ခိုင်ပေစွ၊ ပင်စည်လှသည်
လောကအလယ်၊ အလှကြွယ်ဖို့
အံ့ဖွယ်စွမ်းဆောင်၊ ဂုဏ်ဝင့်ပြောင်၏
အောင်နိုင်သူရို့စိတ်ဓါတ်တည်း --။

စောသျှင်ကျော် (မြေပုံ)

မိုးသထအာရုဏ်

ညဉ့်သန်းခေါင်လေ၊ အမှောင်လွန်မြောက်
အာရုဏ်ရောက်လို့၊ ခတက်ခေါက်ကေ
စိတ်ရောက်ရည်မှန်း၊ သဒ္ဓါဆွမ်းကို
လှူဒါန်းဖို့လေ၊ ချက်လတ်တေ --။

ဂြိုးငှက်လူပျို၊ တေးခြင်းဆိုလို့
စိမ်းညိုရွက်နု၊ နှင်းထုဝီ၀ီ
လီချေသွတ်သွတ်၊ တိုက်ကာခတ်ကေ
ရင်ဖတ်အီးရေ၊ ချမ်းလတ်တေ --။

အာရုဏ်ပျိုးလို့၊ မိုးသထမှာ
နိုးထအားမာန်၊ ဗြိန်းစောင်းသံလေ
တောင်ယံကိုဟပ်၊ ဂလိုင်ထပ်ပျာယ်
ရိုက်ခတ်မြည်ဟိန်း၊ စည်တော်ကြိမ်းကေ
ကြက်သိမ်းထရေ၊ အားရရေ --။

ရောင်နီသန်းကေ၊ ဆွမ်းပန်းရီချမ်း
လှုဒါန်းမျှဝီ၊ မိတ္တာမြီမှာ
ပီတိနှိုးဆော်၊ သာထုခေါ်မိ
မှန်းမျှော်နိဗ္ဗာန်၊ သံစည်သံလည်း
မာန်စွယ်နှိမ့်ချ၊ ငြိမ်းချမ်းစွ --။

မောင်နန်းလှ (မြောက်ဦး)

ဘဝဒဿန

ငိမ်းချမ်းရေ ရွာချေတရွာကြား
ဖြတ်စီးလားရေ ချောင်းကမ်းနားမှာ
ငါးမျှားနီရေကုလချေတယောက်၏ငါးမျှားတံပိုင်
ကျွန်တော်ရေဖြောင့်လည်းဖြောင့် ကောက်လည်းကောက်
လူသားထဲက လူတယောက်ပါ --။

ဝမ်းရေးအတွက်
တနပ်ထမင်းကို ရှာကြံစားသောက်ယင်း
ဘ၀ပယိုင့်ကို ဇလွယ်သိုင်းလို့
အရိုင်းတောနက်မှာ
ကျင်လည်ကျက်စားခရရေ လူတယောက်ပါ --။

ဗုဒ္ဓဘာသာဆိုကေလဲ့
သူတပါးအသက်ကို သတ်ဖြတ်လို့
ပါဏာဋိပါဋာကံကိုလည်း
ကျူးလွန်ဖူးခပါရေ --။

မုသ၀ါဒါကို အဓိပ္ပါယ်မဖွင့်တတ်ကေလဲ့
လိမ်ဝါရေဆိုစွာ
ကျွန်တော်နားလည်ပါရေ --။

အချစ်မှာ ခြီကျွံလို့
အပြစ်တခါးပိုက်နန့်
ဓမ္မသစ်ကျမ်းကိုလည်း
ဖတ်ဖူးပါရေ --။

နားလည်၏ နားမလည်၏
ကျွန်တော်မသိပါ
ဝိပဿနာရှုစားစွာမဟုတ်ကေလဲ့
ဥပေက္ခာပွားများလို့
ကျွန်တော်အိမ်က ထွက်ခွာလားသူပါ --။

နီမကောင်းလို့
စွပ်ပြုတ်ရည် ပူပူတခွက်သောက်ချင်မှ
အိမ်က အမိကို သတိရရေ --။

တော်လှန်ရေးဆိုရေ
အကွေ့အကောက်များရေ
မက္ခရာနယ်မြီထဲသို့ဝင်ရောက်
လမ်းစလည်း ပျောက်ဖူးပါရေ --။

အမှန်တရားအတွက် တိုက်ပွဲဝင်ယင်း
တရားအမှန်ကို ကျွန်တော်မသိခပါ --။

ပျောက်ယင်းရှာ ရှာယင်းပျောက်
ပြောက်ကျားတယောက်လည်း ဖြစ်ဖူးပါရေ --။

(Non-Violence) ကို ကျင့်သုံးရေဆိုခါမှ
ပေါက်ခါနီး မီးတောင် (Volcano) တခုပိုင်
ကျွန်တော့်ရင်ထဲ
ဒေါသတိပိုများလာရေ --။

တိုက်ဖို့ရန်သူက အင်အားကောင်းလို့
ကျွန်တော့မှာ အပ်တချောင်းတောင်မဟိပါ --။

နိုင်ငံရေးပုစ္ဆာကို
အဖြေရှာဖို့ကြိုးစားယင်း
ဝမ်းရေးပြဿနာကို
မဖြေယှင်းနိုင်သူတယောက်ပါ --။

ပဋိပက္ခနန့် ၀ိရောဓိ
အခုထက်ထိ မသေးကွဲ
ဘွဲ့လည်းရဖူးပါရေ --။

သူများကို ဝေဖန်လို့
ကိုယ့်ကျကေ မခံ
တန်ပြန် လျှာလှံနန့်ထိုးသူပါ --။

သတ္တ၀ါရို့သည်
သူတပါး၏ (နှမ်းစိလောက်) အပြစ်ကို မြင်လွယ်၏
မိမိ၏ (ထန်းသီးလောက်) အပြစ်ကို မြင်ခဲ၏ - ဆိုရေ
ဓမ္မပဒဂါထာကို အပြန်တရာ ဖတ်ကေလဲ့
အခုထက်ထိ နှုတ်ကျက်
မရသိမ့်ရေ လူပါ --။

ယေကေလဲ့ ကျွန်တော်
ဇွဲမလျော့ပါသိမ့်
ဆက်တိုက်ဖို့ တိုက်ပွဲအတွက်
အားသစ်တဖန်ပြန်မွီး
ဒါးသွီးလျှက်ပါ --။

သာလှဦး

အသစ်စက်စက်ရက်

မိုးထ ရောင်နီသန်းဗျာယ်
ငါရို့တိအားလုံးအတွက်
အသစ်စက်စက် ရက်တရက် --။

ညကငိုထားရေ အမိမျက်လုံး
တတွတ်ရဲဗျာ မျက်ရည်တိ စိုနီတုန်း --။

(အားတင်းထားပါအမိ) လို့
ဖြေသိမ့်စကားက လွဲ
တခုလည်းမတတ်နိုင်ရေသားတိကိုယ်စား
ခွင့်လွှတ်ဖို့ တောင်းဆိုပါယင့်။

နီပူဒါဏ်ကြောင့်
နီကြံကြံဆံပင်နန့် ငါ့အစ်မ
ဝမ်းနည်းစရာတိများရေခါ
ဇာကိုဝမ်းနည်းရဖို့လဲမသိလို့
(အကျွန်မငိုအောင် ကျင့်ထားရေ) လတ် --။

မတော်မတရား စော်စော်ကားကား
ယုတ်ကန်းတိ အနိုင်ကျင့်ခံရတိုင်း
တက်ခေါက်အံကြိတ်စွာများလွန်းလို့
ပြုံ့လိုက်တေအခါပင်
တင်းနီရေမျက်ကြောနန့်
ငါ့ပါပါ ငါ့အစ်ကို --။

ရောင်နီသန်းရေ
အသစ်စက်စက် ရက်တရက်ကို
ငါရို့ ဘဇောင်ကြိုဖို့ရောင်--။

(ဇုန်ဒတ်)

ဘုရားကိုကျားကိုက်ခြင်း

အယင်ကခါ
ဗလာရွာမှာ
အသေ၀နာဗိုလ်အုပ်ချုပ်တေ --။

တရက်နိ နဂါးငမိုက်
အသေ၀နာခါးပိုက်က
မရွှေဥကို ကျားကိုက်တေဇာတ်
ကပြလတ် --။

တေမိယဇာတ် ကဖို့စွာ
ချက်ချင်းပြန်ပျင်လိုက်ရရေ --။

ကျားကဖို့လူ
ကျားရီယူဝတ်
ကျားဂေါင်းစွပ်ပျာယ်
အလှည့်ကိုစောင့်
ဇာတ်စင်ဒေါင့်မှာအိပ်နီရေ --။

ယလောက်စွာမှာ တယောက်က
ဇာတ်စင်ကိုဓါးနန့်ခွတ်လို့
သိဒ္ဓတ္ထမင်းသား
တောထွက်ခန်း ကဆိုခါ --

ခန္တိကကို ပရုန်းနရုန်းကြိုးတုတ်
တယောက်က မောင်စံလုပ်ပျာယ်
ဇာတ်ခန်းပျင်လို့
မာရ်နတ်တောင်မတားရသိမ့်
ကျားသမား
ပတ်သံကြားစွာနန့်ယူထည့်လိုက်စွာ --

သိဒ္ဓတ္ထ
ကျားကိုက်ခံလိုက်ရရေ --။

ပန် (စစ်တွေ)
ရိုးမမဂ္ဂဇင်း အမှတ် (၃)

ယခီး

ရခိုင်စင်စစ်
ယခီးဖြစ်သည်
အနှစ်နှစ်ရာကျွန်သက်ကြောင့် --။

ယခီးပျော်ပါး
ဝအောင်စားသည်
ဝမ်းကားဖူးရောင်လာသောကြောင့် --။

(သာလှဦး)

ယခီး(နှင့်)ဗချီး

ဗချီး ယခီး
လုံးထွီးထွီး --။

ဗချီးအီးပါ
ယခီးနာ --။

ဗချီးအီးပေါက်
ယခီးကြောက် --။

(သာလှဦး)

မောင်ဝိုင်းချေ

တဖွဲ့တစင်ထောင်သောသူ
ငသံတွေနှင့်တူ --။

ငသံတွေကို အားပီးလူ
ဘိုးတော်မောင်ဝိုင်းနှင့်တူ --။

(သာလှဦး)

(ရခိုင်ပြည်တော်လှန်ရေးမှာ မောင်ဝိုင်းချေတိများနီသိမ့်လို့ ရခိုင့်တော်လှန်ရေးကြီး ပျက်စီးနီရပါသည်။)

အတ္တစီးကြောင်းတလျှောက်

အပိုင်း (၁)

ရာစုနှစ် (၂) လီဖြတ်သန်း
ကန္တရခရီးကြမ်းအောက်
ကျွန်သားပေါက်ဘ၀ ခံစားနီကတ်ရလို့
ဖက်ဆစ်အညစ်အကြေးတိကို
တွန်းလှန်ဖယ်ယှားလိုရေစိတ်
ယိုစီးမှိတ်ကျ ဖြေသိမ့်လို့ပင်မရနိုင်
ကိုယ့်ပြည်ကိုယ့်ကြမ္မာ
ကိုယ်ရို့ ရာ ပိုင်ဆိုင်ချင်
ဘ၀င်မကျနိုင်ရေ
သူ့ကျွန်ဘ၀မြင်ကွင်းထဲ
အဓမ္မပြုကျင့် လုယက်ညှင်းဆဲသတ်ဖြတ်
အသည်းကို လှီးဖြတ်စွာပိုင် အခံရခက်လို့
ဆုံးဖြတ်ချက်ကို အတည်ကိုင်
ယိုင်လဲပြိုပျက်နီရေ ပြည်ကြီးရခိုင်က ထွက်ခွာ
အစိတ်စိတ်အမွှာမွာ ခြီဖျက်ရက်စက်
ဖက်ခွက်ကို လက်နက်စွဲကိုင် တော်လှန်မောင်းထုတ်ခြင်းမှတပါး
တခြားမဟိ ယုံကြည်ခလို့ --။

အပိုင်း (၂)

စရိုက်တူရာ မိတ်ဖြစ်ရာလတ်
ယုံကြည်မှုတူလို့ ဦးတည်ချက်တူရာ စုဖွဲ့
ကိုယ့်ကြမ္မာ ကိုယ်ဖန်တီးနိုင်ဖို့အရေး
ညီညာလက်တွဲ ပေါင်းဖက်မိခကေလဲ့
အသျှင်မြတ်နာဂိန္ဒ ထွင်းထုခရေ
မျိုးစောင့်မော်ကွန်းကိုမှ မထောက်မညှာ
ကိုယ်လိုရာ အတ္တချေတခု
အကြောင်းပြုရေ ပဋိပက္ခ
အမှိုက်ကစ ပြဿဒ်ထိအောင်
မီးလောင်ခံကတ်ရရေ သာဓက
တွိခကတ်ဗျာ မဟုတ်လား --။

အပိုင်း (၃)

တော်လှန်ရေးသဘော
အပြောင်းအလဲ တချို့ကြားက
အတ္တမနော ရှင်သန်ကြီးထွားလာရေခါ
တနပ်စာကို တသက်တာထင်ပနာ
ကျွန်ဇာတာကို ဖက်တွယ်ယင်း
ငါ-မှ-ငါ ဒေါမာန်ခင်းလို့ 
အမြင်ချင်းဖီလာ ကိုယ်ထင်ရာခိုကိုး
အမျိုးနန့်သီလကို မျက်ကွယ်ပြု
ညီညွတ်မှုကင်း အချင်းချင်းဗိုလ်ကျသတ်ဖြတ်
ပရမတ်နန့် ၀ီးကွာကတ်ရရေ --။

အတိတ်ကိုပြန်ကြည့်ပါ ဗလင့်
၁၁၄၆ - က ဒေကနိထက်တိုင်
အောင်လံမထူနိုင်ဘဲ
တော်လှန်ရေးတောက်လျှောက်
သီ-သူ-သီ ပျောက်-သူ-ပျောက်
ဇာတ်တူသွီးကိုသောက်လို့ 
ပြည်ကြီးမဏ္ဍိုင် ပြန်လည်နာလံထူနိုင်ဖို့ဆိုစွာ
အမှန်ပင် ဖြစ်နိုင်ဖို့လားယေ ---။

(အဉ္စနလုလင်)

အထည်ကြီးပျက်

ပညာဟိဖြစ်ပြီး
ပညာမဲ့သူကို
ချဉ်ဖတ်ဟုခေါ်သည် --။

ချမ်းသာပြီး
ပွေသာမဟိသူကို
ဖက်ခွက်ဟုခေါ်သည် --။

ဇတ်မြင့်ပြီး
ဇတ်နိမ့်သူကို
ယုတ်ကန်းဟုခေါ်သည် --။

(သာလှဦး)

ညကစစ်သားသုံးယောက်

ညက မြန်မာစစ်သားသုံးယောက်
ရွာထဲရောက်လာပြီးကေ
ဝက်တောင်း ကြက်တောင်း ခွီးတောင်း
အရက်လည်းတောင်း သောက်ကြူးကတ်တေ --။

နီဝင်ကေ သူသောက်ကြူးရို့
(လက်နက်အားကိုးနန့်)
တယောက်မကျန် မိမ္မချေရို့ကို
မီးပုံဖေါ်လို့ ကခိုင်းရေ --။

ညဥ့်နက်လာကေ
(လူအရိုင်းရို့)
ညီအစ်ကို မောင်နှမကိုလည်းမမှု
အားဓမ္မပြုကျင့်ကတ်တေ --။

ညက မြန်မာစစ်သားသုံးယောက်
ရွာထဲရောက်လာပြီးကေ
အဘာကို (စခန်းတခေါက်လိုက်ခဲ့ပါ) လို့
ခေါ်လားခစွာ
နောက်တရက်မှာ
လက်ပြန်ကြိုးတုတ်
မျက်နှာလည်းချုပ်လို့
ရွာဦးက ဇရပ်ရှိမှာ
ကျားထိုးသတ်လိုက်ကတ်တေ --။

မောင်ကြီးသျှင်ကိုလည်း
ပေါ်တာဆွဲလို့
ချောင်းဖျားခေါ်လားခစွာ
တခါလည်း ပေါ်မလာလီဗျာယ် --။

ကျော်ဝင်းချေ (ပေါက်တော)

ကြက်ဖနှစ်ကောင်

တိုက်ကြက်ဖနှစ်ကောင်
တကောင်က မြန်မာယောက်ဖ
တကောင်က ကုလားယောက်ဖ
တကောင်နှင့် တကောင်ခွတ်
အိမ်သျှင်က အမြင်ကပ်
နှစ်ကောင်စလုံးကို သတ်လို့စား --။

(သာလှဦး

ကန္တာရလူသား


ရီမဲ့ငါး
ရီမစွတ်သော သင်္ကြန်
ရီယှားသော ဆော်ဒီအာရေဘီးယားနိုင်ငံပိုင်
ကိုယ့်ဘ၀က
ခြောက်သွိလှပါရေ --။

(သာလှဦး)

ညီညွတ်ရေးကို ချစ်တေဆို

ညီညွတ်ရေးကို ချစ်တေဆို
မင်းသမီးအပျိုမချေကို
ဂင်တိုတို လူဘိန်းစားနန့်
ထိမ်းမြားနိုင်ဖို့လား --။

ညီညွတ်ရေးကို ချစ်တေဆို
မင်းရို့အိမ်ကို ဓမြတိုက်
မင်းဖလိုင်ဖင်းကို ဒါးနန့်ခွတ်
လူသတ်ဓမြကောင်နန့်
မင်းသမီးဘုတ်ဆုံမကို
ပီးစပ်နိုင်ခန့်လား --။

ညီညွတ်ရေးကို ချစ်တေဆို
အစာဖြစ်လို့ မင်းမယားကျောက်ပေါက်မကို
အိမ်ပေါ်ထက်က နှင်ချရေလဲ --။

လင်မျှောင်ထားခါ
အသဲနာသည်
ဈီးကိုပြီးလီ ညီညွတ်ရေး --။

သာလှဦး
(21/11/2007)

သင်္ကြန်နဖူးစာ

ပျိုနှမရို့စုရုံးဗျာယ် ၀ိုင်းဖွဲ့လို့ဆိုကတ်ပါရေ
ပျိုနှမရို့စုပေါင်းဗျာယ် ၀ိုင်းဖွဲ့လို့ကကတ်ပါရေ

လှပါရေ အ၀တ်အစားဆင်တူညီညီ
ဆံထုံးမှာက ပိတောက်ပန်းကိုယ်စီကိုယ်စီ
နှခွမ်းဆို့နန့် မိတ်ကပ်နီနီ
နှိမ်းလို့ ယိမ်းကလို့ မောင်ရို့ကို စောင့်ကြိုသည် --။

ရိုးရာစိုင်လာ ရခိုင့်အတာသင်္ကြန်မှာ
ရီလောင်းလို့ပျော်ပါး ချစ်စကားရို့ဖွင့်ပြော
သဘောရိုးရိုး စိတ်မဆိုးပါ --။

ပြောပြောလိုက်ပါ ချစ်ချစ်ကြောင်းကို
သင်္ကြန်ရက်အတာမှာ သင်္ကြန်နဖူးစာ --။

(ဖွင့်ပြောလိုက်ပါ ချစ်တေအကြောင်းကို ရင်ထဲမှာ မျိုမထားကဲ့
အေပိုင်လှရေ အကောင်မချေတိ ဒေတသက်မှာ တခါလည်းမတွိဖူး
ပန်းပီးကေ လက်ခံပါဝေ ချစ်တေဆိုစွာ အေရာမနား)

တနှစ်တခါ သင်္ကြန်ကျ ရီလောင်းဖို့မောင်ရောက်လာရေ
ချစ်ကြိုက်တေ မိတ္တာစကားကို အလေးထားလို့ လက်ခံပါဝေ။

ချစ်တေကြိုက်တေဆိုကေ လက်ခံပါမည်
ကတိသစ္စာတည်မည်စကားကို မရီးရို့ကကြားချင်ပါရေ။

ချစ်တူကိုယ်တူ သက်ဆုံးတိုင်ပေါင်းကတ်ပါမည်လေး။

ရွာသူကြီးထုံးဗူး

နန်းမြင့်တော်ဝင်
ပန်းသဇင်လျှင်
အပင်ခြီရင်း
ကြွီသက်ဆင်းလျှက်
မ၀င်းမပြောင်
အရောင်နွမ်းညှိုး
ညှာတံကျိုးလို့
ဘ၀မိုးမှောင်ကျလားခဗျာ --။

လမ်းဘေးက သဇင်ပန်း
ထိုခေါက်ရမ်းကို
ထိုလူနမ်း ဒေလူခြွီ
ဒေလူမွှီ ထိုလူကျုံး
(ရွာသူကြီးအိမ်က) ထုံးဘူးပိုင်ယှောင် --။

ညဥ့်လုံးပေါက်
လျှမ်းလျှမ်းတောက်
မာကျူရီမီးလုံးများအောက်
အရောင်နွမ်းပျောက်
နယူးယောက်မှာ ဒူးထောက်
သဇင်ပန်းခြောက် --။

(သာလှဦး)

ပန်းမြတ်သဇင်

ပန်းမြတ်သဇင် - ပန်းသဇင် - သဇင်ပေါ်စ
နှင်းဝီ၀ီကေ - နတ်တော်လ --။

ပြိုင်းတောင်ကျော်လမ်း
ခမောင်းပင်မှာ - သဇင်ပန်း --။

ဆွတ်ခီဆွတ်ခီ
မယ်နှမမှာ - သဇင်ပန်းကိုပန်ရစီ --။

နှမပန်ချင်
ပျိုတိုင်းကြိုက်တေ - ပန်းသဇင် --။

မယ်ကြင်မောင်ဝေ - တက်လို့ဆွတ်ကေ
ရခရေ --။

ပန်းပွင့်သဇင်
မယ့်ဂေါင်းထက်မှာ - လှလို့ပင် --။

တ၀က်ကိုပန် - တတန်နောင်ကျိုး
မြတ်စိန္တေလေ - ညောင်ရည်အိုးမှာ
အပြည့်ထိုး --။

မောင်နှင့်နှမ
သဇင်ပန်းကို - အရင်းတည်
မောင်မယ်နှစ်ဝ
အခါတန် - သင်္ကြန်လမှာ ပေါင်းရပါစီ --။

ဆံတော်ရှင်လေ - စေတီရင်းမှာ
ဆုတောင်းလီလည်း - ဆုတောင်းလီ --။

(ရခိုင်ကျွန်းရွာကဗျာ)
(ရှာဖွေတင်ပြသူ - ခိုင်ဇေယျ)

သုတေသီ

သုတေသီဟု
ပညတ်ပြုသော
ဗဟုသုတ
လွန်ကြွယ်ဝသော ဆရာ --။

ကမ္ဘာ့သမိုင်း
ဖြစ်စဉ်တိုင်းကို
ပိုင်းခြားဝေဖန်
တိကျမှန်သော ဆရာ --။

မြန်မာရာဇ၀င်
ကျမ်းစုံလင်ကို
ရင်သတ်မိမော
ဟောပြောနိုင်သော ဆရာ --။

ပိဋကတ်သုံးဖုံ
အလုံးစုံကို
အာဂုံဆောင်လျှက်
နှုတ်ကျက်ရသော ဆရာ --။

ရခိုင်သမိုင်း ရခိုင်စာကျ
လေ့လာကြိုးကုတ်
ဖော်ထုတ်ဖို့ရန်
သူက မိကွန်ဆောင်နီ၏ --။

ဟက်ကရီကျမသား
ဝမ်းဖားဖား
ကားရီကားရား
ဝက်ပိုင်ယှောင်စား
ဝက်ပိုင်ယှောင်လား --။

ဘွဲ့လုံးထီးထီး
ထန်းသီးလုံးထက်ကြီး
ဓပြုတ်သီးထက်ကြီး
(လီးလိုက်တေပင်) ထမ်းလို့မပါ
ကာလနာ --။

မောင်ဂေါက် (ရခိုင်ပြည်)

မျန်မာစကားသိပ်ပေတာပဲမောင်မင်း

ဝမ်းရေးအတွက်
အသက်ဆက်ဖို့
မရှက်မကြောက်
ဖောက်ပါရသည်
ကတိဟူသော ကျိန်သစ္စာ --။

ထွက်လာခါစ ရဲရဲတောက်
ပါးစက တပေါက်
အခုက လေးငါးခြောက်
ခွံ့ရကျွေးရမလောက်
(ဂြောက်ဂြောက်) နန့်
ဂျောက်ထဲကို ကျောက်သီးချယှောင် --။

စားလည်း ကကောင်းစားနိုင်ကတ်တေ
စာသားပြင်းချေတိကိုကြည့် --။

တိုင်းပြည်အီးအီး မအီးအီး
အရေးမကြီး
ဝမ်းမီးအီးဖို့ အရေးကြီး --။

တိုင်းပြည်ကောင်းစားစား မကောင်းစားစား
သတိမထား
မယားကောင်းစားဖို့ အဓိကထား --။

လူမျိုးချောင်းကျကျ မကျကျ
ကိုယ်ဂွမကျကေ ကျီ --။

(ယခိုင်ပျည်ကျီး သီးချားလွတ်မျောက်ယေးအတွက်
လက်နက်ကိုင်တော်လှန်တိုက်ပွဲဝင်ကျ)

ငုတ်ယင်းပေါ် ပေါ်ယင်းငုတ်
မြုတ်ယင်းလှော် လှော်ယင်းမြုတ်
စင်းပြတ်ပြုတ် --။

ငပျင်းလောင်းလှော်ပိုင်ယှောင်
ကြိုးကမဖြုတ် လှော်ယင်းစစုန်းမြုတ်
တော်လှန်ယင်း
အမျိုးပြုတ်ကတ်လိမ့်မည်သတိထား --။

(မျန်မာစကားသိပ်ပေတာဘဲ မောင်မင်း)

(သာလှဦး)

ဝက်ထီး

ဝက်ကိုအစာကျွေးစွာ
ချစ်လို့မဟုတ်ပါ --။

ခြံထဲက ၀က်ကို
ပိုးပိုင်မွီးစပ်
နိစိုင် အစာကျွေးကတ်တေ --။

ဝက်ကြီးက
တနိထက်တနိ
တရက်ထက် တရက်
ထီးထီးလာရေ --။

ရီချိုးဗျာယ်
ခါးသပ်ပီးကေ
(၀က်ထီး) က
ကကောင်း ကျေနပ်နီရေ --။

သံဝေဂရစရာ
အများမကြာ
(၀က်ထီး) ကို လှံနန့်ထိုးခါ
ကျွီးလိုက်တေ ၀က်
ကမ္ဘာပျက်ယှောင် --။

ယပြီးကေ
အသွီးကိုထုတ်
အရီကိုဆုတ်
မီးဖုတ်ကြပ်တိုက်
(၀က်ထီး)
မျက်ဖြူဆိုက်ရပါဗျာယ် --။

နောက်ဆုံး လူတိက
ဝက်သားကို ချက်စားဗျာယ်
ဝက်ဂေါင်းကို
စွပ်ပြုတ်လုပ်ပစ်လိုက်တေ --။

(၀က်ထီး) ဘ၀
ပျက်စီးရပါဗျာ --။

(၀က်ထီး)
ဇာလည်းမတတ်နိုင်ပါဗျာ --။

(သာလှဦး)

ပန်ချင်သူ

ရက်ပြတ် လှည့်မကြည့်ပါကဲ့
မျှော်သူရင်ကျိုးအောင်
သရော်စွာလာ --။

မင်းမျက်ဝန်းက
ရင်ကိုလန်းစီလို့
တော်ဝင်ပန်းကိုမှ
တမ်းတလိုချင် --။

ပန်းမြတ်အထွဋ်သဇင်
အာကာမှာယဉ်ယိမ်းလို့
ကြိုင်မွှီးရေအသျှင် --။

ရွှီတူငွေတူ သရဖူဖြစ်လို့
ချစ်လွန်းရကြင် --။

(သာလှဦး)

ဇာကိုလားလို့ ဖြေရမည်

ဆီးနှင်းစိုစို ပြာသိုလည်းလွန်
လက်ပံပွင့်ဖူး ရာသီပြောင်း၍
တပေါင်းကူးသော် --။

ဝမ်းနူးစဖွယ် တောမြိုင်လယ်မှာ
တွန်မြည်ယင့်ယင့် ရင်ကိုဖွင့်လျှက်
ပင်မြင့်ထိပ်ချာ ကိုင်းအညှာမှာ
နားကာလှမ်းထောက် မြကန်သာကို
ဝဲလာရောက်ကာ ရီသောက်လာသော
ဥသြရွယ်ပျို သာခြင်းဆိုကေ
ဇာကိုလားလို့ဖြေရမည် --။

တောင်ကမူမှာ ဂူလည်းပြိုပျက်
နွယ်မြက်ဆောင်းဆောင်း တရောင်းရောင်းဖြင့်
ရှိဟောင်းဘုရား ဥက္ခောင်းကျိုးမှာ
ဂြိုးညိုနားကေ ဇာကိုလားလို့ဖြေရမည် --။

ညောင်ကြပ်မြီမျို ဇာတီအိုလည်း
ပြိုပျက်ယိုယွင်း ကိုးကွယ်သူလေ
လူသျှင်ကင်းလို့ သတင်းနီဝင်
လပပြင်မှာ ဟင်းလင်းမြင်ကေ
ဇာကိုလားလို့ဖြေရမည် --။

(သာလှဦး)

ခုနစ်ရက်သတ္တတပါတ်

တလင်္ဂုနီ တလင်္လာ
နိမြတ်ရက်ရာဇာ --။

င်္အဂါ ဗုဒ္ဓူး
ရွှီမြို့မြောက်ဦး အောင်သံကျူး --။

ကြသားပတီး သောက်ကြာ
စည်တော်လည်းတီး မင်္ဂလာ --။

စနီ နဂါးမောက်
အခေါင်မိုးသို့ရောက် --။

အနာ


ပစကတော့ ဝေသာလီ
လက်မှာတော့ ၀ီစကီ --။

(သဇင်မြီ သန့်နိုင်)

သုံးသပ်ခြင်း

အဝေသူငယ်ချင်း
မင်းလည်းရခိုင် ငါလည်းရခိုင်
ငါရို့တိမှာ ဖျောက်သင့်စွာက
ဆင်းရဲသူ လူမဟုတ်
ပုဇွန်ဖြူငါးမဟုတ်
ဆင်းရဲကေနှိမ် ရတတ်ကေမုန်း
အကြံတူ ရန်သူ ကိုယ့်ထက်သာမကြိုက်
ဒေပိုင်စိတ်ထား အတ္တများနန့်
အများကြိုက်နှစ်
ဇာမျိုးချစ်လည်းမဖြစ်နိုင် --။

(ဦးသာမောင်)

ရခိုင်သားနိုင်ငံရေး

ပြောခါ လွတ်လပ်ရီး
လုပ်ခါ ဖွတ်ချီး --။

ပြောခါ ဒီမိုကရေစီ
လုပ်ခါ လီမိုကရေစီ --။

ပြောခါ လူ့အခွင့်အရေး
လုပ်ခါ သူ့အခွင့်အရေး --။

ပြောခါ ညီညွတ်ရေး
လုပ်ခါ နဖူးကွဲ ဒူးပြဲ --။

အယင်ခါ ကျင်သန်
အခု နရန်းလန် --။

အောက်အီးအီးတွန်သော ဝံလက်

ရဲရဲတောက်
အမောက်နီနီနန့်
တိုက်ကြက်ဖကြီး
အီကရီးမတွန် --။

မာန်ပေါက်ပေါက်
တွန်ဟောက်လိုက်သည်
အောက်အီးအီးအွတ် --။

ထောင်တည်မော်ကွန်းသူရဲ

အဖွဲ့အစည်းတခု၏နယက
အကြံပီးအရာဟိကြီးပ
ရုတ်တရသီဆုံး
သျှင်လူအားလုံး
ယူကျုံးမရ နှမြိုးတသ
အဖရခိုင်ပြည်၏
သားကောင်းရတနာကြယ်မွန်
အချိန်မတန်ခင်
ကွယ်လွန်စွာစော
အကျွန်ုပ်ရို့အား
ကြောခိုင်းလားဗျာယ်
ဘစောင်ပျင်လို့ ရက်စက်စွာလဲ
ခေါ်ကေလည်းမထူး
ငိုကေလည်းမကြား
ဥပက္ခေတရားနန့်
မရဏရထားစီးလို့
ကျွတ်လားခဗျာယ် ---။

အလေးပြုကတ်
ရပ်စောက်ရပ်ကတ်
ဂေါင်းညွတ်ဂုဏ်ပြု
(၃) မိနိလောက်
ကောင်းရာသုဂတိ လားစီဖို့ ---။

ဆရာကြီးရေ
စာသမား ပီသမား
ဘာသာရေးသမား
စာဟောဆရာကြီး
ဘိန္ဓောယမ်းကု
စွယ်စုံရ ပါရမီသျှင်
မျိုးချစ်ပုဂ္ဂိုလ်
နိုင်ငံရေးသမား တော်လှန်ရေးသမား
လူအများက နာမကင်းပွန်း
အမွှမ်းတင်ခေါ်ဝေါ်
ဒေါ်လာသန်း (၅၀၀)
(Project) ဆရာကြီး ---။

ဆရာကြီးချန်ခ
ဂျောင်ထဲက အညတရ
တေတ္တာတလုံး
ပုလဲကုံးရတနာ
အဿပြာသိန်းသန်း
နီမြန်းသော ပတ္တမြား ---။

ဖွင့်ကြည့်သောအခါ
နွမ်းရိကြီမွ မှိုတက်လျှက်
အ၀တ်စနန့်ထုပ်ပိုး
ပိုးထိုးကြွက်ကိုက်
လက်နှိပ်စက်မူ ဆောင်းပါးတပုဒ်
မဂ္ဂဇင်းတအုပ်က
ကော်ပီကူးထားစွာ ---။

၎င်းအပြင်
စာလုံးမပီမပြင်
(Type) ရိုက်ထားသော
ဘာသာပြန်တမူ ---။

ဆရာကြီးသည်
စာပီကို အသက်ထက်မြတ်နိုး
တန်ဖိုးထား၏ ---။

ဂျောင်ထိုးသိမ်းထား
ကြွက်ကိုက်စား၏ ---။

မည်သူမည်ဝါ
အသူပင်လာတောင်းတောင်း
မပီး ---။

အာဂပုဂ္ဂိုလ် ခေသူမဟုတ်
သို့အတွက်ကြောင့်
(အကြံပီးကြီး - နယကကြီး)
ကောင်းချီးကင်းပွန်း
အမွှမ်းတင်ကျူး
ရွာဦးနတ်ပိုင်ယှောင်
ပူဇော်ပသ ကိုးကွယ်ရစွာ ---။

ဆရာကြီးမြတ်နိုး
တန်ဖိုးထားသော
ပြည်တန်ပတ္တမြား
(ထောင်တည်မော်ကွန်း) ကို
ဆရာကြီးစီးရာ
သင်္သရာရထားလားရာ
တဖ၀ါးမကွာ ကပ်လျှက်ပါဖို့
အလောင်းနန့်ခေါင်း
ကျမ်းဟောင်းမော်ကွန်း
ဇတ်လမ်းသုံးပွင့်ဆိုင် ---။

နောက်နိညဥ့်
ရက်လည်ဆွမ်းမကျွေးရသိမ့်ခင်
သက်ဆိုင်ရာ
အဖွဲ့အစည်း (၂) ခု၏ယုန်းခန်း၌
ထောင်တည်မော်ကွန်း
သူရဲခြောက်သည်ဟူ၏ ---။

(မယုံလျှင် စုံစမ်းပါ။)

ဇာတ်လမ်းကို အဆုံးသတ်ခန်း

သဘာပတိများကြွလာကေ
ရပ်စောက်ရပ်အလေးပြုရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

သက်တန်းကုန် ၀န်ကြီးတိနန့်တွိတိုင်း
ခါးကိုင်းဦးညွတ် အရိုအသေပီးရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

ပြက္ခဒိန်မှာ ဆီးမှင်အနီကွက်ကျား
ရက်တိကများများ
ညိတိုင်းညိတိုင်း ဆန္ဒပြရဖို့လား
အခမ်းအနား အခမ်းအနား နိမအားညမအား
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

အစည်းအဝေးတက်တိုင်း
ငွေရေကြေးရေးအယှုတ်ယှင်းရ
ညီညွတ်ရေး ညီညွတ်ရေးဆိုဗျာ
နဖူးကွဲဒူးပြဲ အလဲထိုးရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

အချိန်တန်ကေ အချိန်မှန်ထုတ်ပြန်ရေ
လံကြုတ်သတင်းတိကို
ရေဒီယိုဖွင့်တိုင်းကြားနာရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

ရခိုင်တခွန်းမပါ
ရခိုင်အမျိုးသားမြန်မာသတင်းစာကို
လစဉ်ပုံမှန် စာမျက်နှာလှန်လှန်ဗျာဖတ်ရ
ကျွန်တော့်မှာ တော်လှန်းရေးအတွက်
ပင်ပန်းလားခပါဗျာ --။

မမြင်ချင် မကြည့်ချင်အဆုံး
မျက်နှာတိကို
မြင်ရပြုံးပြရ ဘ၀ဒုက္ခများစွာနန့်
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

ရန်သူကို တော်လှန်ဖို့အချိန်မရ
ရွှေလဒများကိုကျည်း တိုက်ခိုက်နီရ
ကျွန်တော့်မှာ တော်လှန်ရေးအတွက်
ပင်ပန်းလားခပါဗျာ --။

(သာလှဦး)

  © Blogger templates 'Sunshine' by Ourblogtemplates.com 2008

Back to TOP